港股周四早市一度攀上3萬點樓上，高見30025.07，唔知係咪咁，刺激賭王何鴻燊再開金口，計上次最快貼中恒指第三季見二萬五點後，再話港股可上望4萬點，因為十七大會議表明力撐港澳經濟，相信經濟一定冇衰，港澳前途無可限量。燊哥嘅後市預測，即時引起散戶網友熱烈討論。
冇講時間噏乜都得
Vegetable3388就問：「股神四叔話3萬點要減持，賭王就話上望4萬點，兩個都係生意人，邊個可靠啲呀？」
以貌取人嘅Neverbear認為，「睇個樣，四叔好似正氣啲，可信啲。」steve3609亦話：「何生吹水多啲噃。」Mrlicoln插口：「燊哥都冇講話幾時見4萬，咁即係得個噏字啦。」Yylam713好同意：「冇講時間，講乜都得啦，可能係10年後啫！」
Antonyada打趣話：「唔通賭王想取代四叔喺我哋心目中嘅股神地位？」FaiFai14踢爆話：「賭王夠話去葡京賭錢會發達，你信唔信吖？」拜仁再加把口：「你估打牌咩，話上就上，上得咁易？」咁又係，有時想上隻四萬都好難㗎！」
莫非曲線暗撐陳太
花花龍就陰謀論咁睇：「唔通賭王其實係暗撐陳四萬，又唔好意思開口講出嚟，咪話上望4萬囉。」好心情打蛇隨棍上：「既然係咁，支持陳四萬，支持股市升上4萬！」
不過小旋風就諗：「佢話二萬五，啲人話佢黐；跟住再講3萬，啲人再話佢癲；今次4萬，又俾人講佢喪，但唔知會唔會真係又俾佢估中。」
http://www.extremefunnypictures.com/funnypic2621.html
報料站
歡迎提供網上財經趣聞，資料一經採用，酬100元。
請附姓名、電話及電郵地址，交mailto:[email protected]