諾貝爾獎經濟學獎揭曉，教授Ｌ知道得獎人名單之後，非常高興，可能全香港最高興嗰位就係佢。點解呢？得獎人之一LeonidHurwicz（赫維奇）長期任教於明尼蘇達大學經濟系，教授Ｌ當年自芝加哥大學畢業後，就到明尼蘇達讀博士，博士論文導師之一就係赫維奇。得獎人之二係芝加哥大學經濟系教授RogerB.Myerson（邁爾森），教授Ｌ位公子去年在芝大就曾經修讀呢位教授嘅博弈論，與教授Ｌ有間接關係。得獎人之三出自普林斯頓，就係EricS.Maskin（馬斯金）。又有咁啱嘅，邁爾森與馬斯金係哈佛同班同學，一齊喺一九七六年取得應用數學博士學位。赫維奇讀法律出身，其他兩位讀數學，但最後成為頂尖經濟學教授，所以話做學問最緊要打好基礎，尤其是數學，就比較容易在社會科學、經濟學出入自如。
瑞典皇家科學院指出三位得獎者創下「機制設計理論」（mechanismdesigntheory），該理論對現代經濟學，以至政治學有重大貢獻。左丁山問教授Ｌ何謂「機制設計理論」？教授Ｌ話，簡單地講，在不完美競爭市場底下，不同企業（firms）與政治團體各有利益，彼此經常為爭取最大利益而博弈、談判（例如電力公司利潤管制協議，停車熄匙，西九文娛藝術區單一招標，文物保育方式等等），經濟學家利用博弈論（gametheory）引伸到成立一套機制去設定談判遊戲規則，監管模式以及拍賣方式等等，以解決上述議題。3G頻譜拍賣方法，就係來自呢套理論。
左丁山同教授Ｌ講：「香港公共政策有冇應用過呢套理論呀。」教授Ｌ話：「政府賣地以公開拍賣方式為主，好合乎理論，可惜其他範疇就用唔上。」或者呢三位教授得到諾貝爾獎後，香港特區政府會識得應用吓，最好就係請Ｌ教授教番幾堂。赫維奇教授已經九十歲，分到三分一獎金（五十萬美元），老人家話對佢嘅退休生活好有幫助。
赫維奇一位學生麥法登已在二○○○年得到諾貝爾獎，好彩佢夠長壽，卒之輪到佢攞。