喜劇要好笑，從來不是單靠主角一人就能成功。身為襯托巨星的綠葉，也是不可或缺的一分子。
林子善就是其一，他於《奸人堅》中飾演黃子華身邊的角色，卻因為子華而令他有更大的發揮。《奸人堅》為他帶來師傅艾威、師公許紹雄，也令他有接拍其他劇集的機會。當年憑周星馳電影《喜劇之王》中飾演洪爺入行的林子善，呷着苦後有甘的廿四味說：「我唔介意做小角色，但係終有一日我會有料打呢場仗。」 撰文：藍文浩、蘇芬妮
林子善16歲一入行，便在周星馳電影《喜劇之王》中飾演洪爺一角。入行前，子善與吳浩康（Deep）是元朗伯裘書院的同學，他笑着說：「佢唱歌真係好叻，我同佢由細玩到大，仲講笑話將來一個唱歌、一個拍戲，佢以前邊有咁靚仔呀，我細個仲大隻過佢，不過佢彈結他真係有一手。」
難兄難弟 夥吳浩康闖娛圈
林子善回想九年前的入行經過時說：「嗰陣星爺同商台一齊搞訓練班，但係其實我志願係做dancer，啲同學包括阿Deep就話不如試吓先。後來有同學偷咗我本手冊幫我填資料報名，所以先會去參加。當日一去到廣播道，啲人排到上山頂，我就諗邊會揀到我呀！入到去我扮秦沛喺《賭聖》入面個角色，話自己叫洪爺，點知周生就以為我真係叫洪爺，就咁入咗行囉。」
其後林子善簽約田雞旗下，兩年後即擔正《洪興大飛哥》，他說：「基哥（李兆基）喺《喜劇之王》試鏡已經識，後來佢搵我拍《洪興大飛哥》。嗰陣出得嚟兩年，咁嘅年紀有幾多料呀！嗰陣係打天才波，咁大機會喺面前，自己梗係去到盡啦。之後一路拍好多小本電影，到2000年就大鑊喇，市道好差，公司又轉型，田雞離開咗公司，周生又忙到冇時間理，就咁維持咗兩年。」
市道萎縮 轉型打碟當DJ
約滿後，電影市道無可再差，機緣巧合下，林子善轉型打碟當DJ，他說：「當時真係靠打碟維生，去到馬來西亞，一晚打3、4場，一次去4、5日，每場都有4,000至5,000蚊。當地人真係當我哋係大明星，一架大旅遊巴載我哋幾個人，去到邊都幾十人同我哋打招呼，喺吉隆坡我哋張海報仲係同Sammi（鄭秀文）平排一齊擺，喺香港的話邊有人識呀？」雖然內容有點酸，但他的語氣卻總帶着樂觀的味道。
直到前年萬聖節前，終於出現谷底反彈的轉機，林子善說：「李璨琛話志偉搵人幫手搞演藝人協會一個萬聖節騷，叫咗我去幫手。到後來慶功，志偉問我係咪仲喺星爺間公司，我話唔係，佢竟然問我點解唔出聲，嗰時真係覺得佢係苦海明燈，點知後來等等等，過咗半個月都冇聲氣，到佢生日先有機會再見面，當晚鼓起勇氣再問佢啦，佢就即時介紹咗我阿媽（經理人Carol）畀我識。我到嗰刻先知，原來志偉一直都有將呢件事擺喺心中，佢喺我最唔如意嘅時候救咗我。」
貴人扶持 許紹雄指點執生
林子善飾演《奸人堅》中的金錢豹，他對拍檔讚不絕口：「本來金錢豹冇咁多戲，不過子華同我講場戲淨係睇佢唔好睇喎，我哋要配合先夠豐富，所以佢改完啲劇本都會畀我睇，又會問我想點演，佢真係好肯教後輩，你問就一定得。其實我只係一個𡃁仔，佢使乜問我呀，所以我覺得佢好尊重人。」
林子善續說：「師公Benz（許紹雄）呢就人人都玩，冇面畀，不過就從來都冇玩過我，連子華都覺得佢好錫我。其實拍《秀才遇著兵》已經識，不過好少對答。我少拍電視劇，有次我走錯位搞到佢背晒鏡我都唔知，佢同我講：『你對住我哋就冇所謂呀，如果係啲阿哥阿姐就實鬧死你㗎！』成套劇入面佢灌輸好多嘢畀我。」至於艾威則被他稱呼為師傅，林子善說：「威威當我係細佬，佢份人好好，成日同我玩，仲成日介紹其他導演、監製畀我識。」
珍惜機會 無懼定型當打樁
身邊不斷出現貴人，令林子善學懂珍惜和把握每一個機會，他說：「我早沉好過遲，𠵱家會知道機會話冇就冇，以前有戲拍就嘻嘻哈哈，𠵱家有得演就會用心去演同創作。」
很多藝人都怕被定型，對於每次都是以搞笑壞蛋蠱惑仔形象在鏡頭前出現，他不以為然地說：「開始嘅時候都會驚，但係有一個前輩同我講，佢話定型先至有陣腳，有支樁先穩陣，雖然你自己可能唔係咁，不過如果連型都定唔到，就會連機會都冇。」
林子善說：「我完全唔介意做小角色，角色一定有大細，我未有經驗，𠵱家畀個主角我做都承受唔到，我寧願乜都試吓，但係終有一日，終有一日我會有料打呢場仗。𠵱家我寧願人哋覺得套劇好睇先。」
攝影：仇志德
場地提供：恭和堂
星爺綠葉晒冷PartI
林子善
經典角色：洪爺《喜劇之王》
經典對白：「嗱，呢壇嘢就係俾把老牛剮出嚟嘅！」（展示腹前疤痕時說）
角色重溫：MK打扮的小混混洪爺，以一把重捲脷兼老牛聲橫行長洲，並率領田雞和甜筒輝向阿婆收「陀地」，恃強凌弱。後來其嫲嫲得知他要參演《雷雨》，高興得錫他一啖，洪爺嚷道：「我一世英明，換嚟一臉口水。」那一刻，他改邪歸正。
現況：最近參演電影《七擒七縱七色狼》及劇集《奸人堅》。
李思捷
經典角色：導演《喜劇之王》
經典對白：「試吓白鴿頭對住我，試吓白鴿屁股對住我。」（衡量應否用白鴿拍戲時說）
角色重溫：李思捷扮演極盡浮誇的導演，時刻拿着未燃點的香煙。其中一幕講星爺擔任莫文蔚替身，雙手着火，李思捷卻猶豫應否用白鴿去提高意境，遲遲未叫「action」，結果星爺一roll機便NG，激得李思捷暴跳如雷。
現況：《喜劇之王》是李思捷首部參演的電影，其後他模仿四大天王而成名，早前在新秀騷扮譚詠麟、郭富城和林子祥，幾可亂真。
鄭文輝
經典角色：甜筒輝《喜劇之王》
經典對白：「我想食甜筒！」（被李兆基掌摑後哭着說）
角色重溫：甜筒輝港大畢業後當上蠱惑仔，獲安排收「陀地」時遇上惡霸李兆基。甜筒輝用樹枝「篤」李兆基下體，被對方摑至血流披面。其後甜筒輝手執兩把菜刀、兇神惡煞的衝向李兆基圖「攞尾彩」，終在天后廟前收到20元保護費，還被洪爺戲稱為揚名立萬的第一步。
現況：本身是《食神》和《喜劇之王》的編劇，後來監製漫畫《校園撚人王》，賣個滿堂紅。
何文輝
經典角色：醬爆《少林足球》
經典對白：「我醬爆感覺到喺呢個moment，要爆啦！」（聽星爺唱山歌，燃起心中的一團火時說）
角色重溫：星爺在大街大巷唱山歌，趙薇潑冷水指神經病才在這兒唱，醬爆不同意趙薇說法，還表示從沒放棄做作曲家的理想，說罷即鬼上身般邊跳機械舞，邊哼出「多……多是多是儍」，爆笑程度真的有如他說的「要爆啦」。
現況：在《功夫》中繼續擔任舉足輕重的「二打六」角色，還在片中露出半邊屁股，絕不比梁朝偉遜色。
星爺綠葉晒冷PartII
谷德昭
經典角色：對穿祥《唐伯虎點秋香》
經典對白：「魚肥果熟嫲撚飯」（與星爺出對時說）
角色重溫：扮演七省文狀元兼參謀將軍、有「對王之王」之稱的對穿祥，到華府生事時遇上星爺扮演的華安，二人即場比試對聯，內容三級之餘卻出奇地異常工整，堪稱當代文學的典範。對穿祥被華安連番出言戲弄，典在地上吐出一公升鮮血，該幕戲至今仍歷歷在目。
現況：擔任《唐伯虎點秋香》的編劇，其後更當上導演，執導多齣喜劇如《大內密探零零發》及《行運超人》等。
李健仁
經典角色：女學生《食神》
經典對白：戲中只有一句對白——「食神！」
角色重溫：星爺扮演的食神新店開張之喜，得悉有傾慕他的女學生fans前來獻花，引發無限遐想。原來那女學生是李健仁，只見他穿起女校服，紮起長長孖辮，先以一記招牌挖鼻孔跟星爺行禮，再以輕快小跳步彈向星爺身邊，李健仁未埋身已被對方一腳伸到老遠。
現況：星爺的中學同學，除在多套星爺電影中客串外，又出書大爆星爺秘密。
馮勉恆
經典角色：汽車維修員《少林足球》
經典對白：「呢啲只係虛名嚟啫，就好似浮雲一樣。」（被吳孟達稱讚其球隊作風勇悍時說）
角色重溫：馮勉恆飾演的汽車維修員以隊長身份率領茅躉球隊，跟星爺的球隊作友誼賽，賽前不慎跌出藏在身上的士巴拿和鎚仔，不過他淡然說：「身為汽車維修員，有士巴拿喺身係好合理啫！」落場後即發揮茅躉本色，最後還脫下內褲，迫黃一飛笠在頭上。
現況：表面上是臨時演員，實際上是電影編劇，也有參演星爺新片《長江七號》。
田啓文
經典角色：三師兄《少林足球》
經典對白：「我秒秒鐘幾廿萬上落㗎嘛！」（被星爺邀請參加足球比賽時說）
角色重溫：穿亁濕褸一副中環股票經紀look的三師兄，邊聽假電話邊告訴星爺秒秒鐘幾廿萬上落，實則一貧如洗，兼要踩單車代步。片末他本着荊軻刺秦王那份必死無疑的決心，替少林足球隊把守最後一關，上陣前致電向阿珍表白，成為最凄美的現代愛情故事。
現況：跟隨星爺工作多年，現任星輝公司的策劃總監。
