經過兩輪國際賽，球迷較為熟悉嘅聯賽終於今周末返嚟，不過要留意下周中又要打歐聯，國腳眾多嘅球隊，如果分心歐聯，今周聯賽隨時爆得，周六嘅蘇超格拉斯哥打吡戰，我就博作客嘅些路廸贏。
蘇格蘭喺歐國盃外圍賽係威係勢，國內班霸格斯拉哥流浪都居功不少，好似華亞、巴利費格遜、麥高洛治等都幫國家隊出盡力，新晉右閘侯頓更加搞到傷埋，今場打吡戰應該唔使預佢；格流今季歐聯打得唔錯，分組賽兩戰全勝，不過原來佢哋要犧牲聯賽，歐聯分組賽之前兩場聯賽都未贏過。些路廸其實都有唔少蘇格蘭國腳，史葛布朗、赫特利都因此受傷，好在日本中場大腦中村俊輔，唔使返國打太公波，休息充足，絕對有權作客贏波，一於選些路廸贏2:1波膽。
一注阿積士「主其他」
法甲班霸里昂，𠵱家已經係法國國家隊大戶，賓施馬、賓艾化、杜拿蘭都為國家隊出唔少力，好衰唔衰里昂歐聯分組頭兩場輸晒，下周二作客史特加再輸，就差不多出局，為名為利一定要博。里昂今仗主場對摩納哥實在可勝不穩，摩納哥上季兩鬥里昂都不敗，一於冷敲摩納哥和1:1。
冷膽再向荷甲埋手，阿積士歐協盃出局，並不算太慘，事關呢班兵賣走好多主力，專注爭聯賽好過；周六佢地就主場對奈梅亨，一個「主其他」波膽就夠。文：牽牛
貼士
波膽過關3串4
星期六8些路廸勝2:1（9倍）x
星期六56里昂和1:1（7.5倍）x
星期六62阿積士勝主其他（12倍）
全中1,104倍