歌神許冠傑（Sam）嘅新歌《藍天消失了》同12位叱咤903DJ包括森美、小儀、少爺占、Donald等合唱，噚日眾DJ喺紅磡錄音室錄音，阿Sam專程到場指點，不過佢之後趕住為佢12月喺大球場舉行嘅演唱會開會，冇同記者做訪問就走咗，森美特登帶咗阿Sam以前嘅唱片同埋電影《全家福》嘅DVD到場，阿Sam都唔得閒簽名，小儀都冇機會單獨同佢合照。
「佢真係好大隻」
森美原來係阿Sam嘅忠實fans，佢話：「我細細個已經鍾意佢主演嘅《衞斯理傳奇》同埋《半斤八両》，我覺得佢做嘅令狐冲、衞斯理冇人可以代替，造型風流倜儻，形象又健康開心。我今次係除咗演唱會之外，第一次咁近距離接觸佢，佢真係好大隻，今次冇機會同佢合照，希望之後有啦！」小儀知道歌神鍾意豹紋，特別帶咗豹紋公仔到場，佢話：「阿Sam對我哋有讚冇彈，佢嚟到又好開心係咁笑，所以我哋冇壓力。」
問到阿Sam在大球場的演唱會，眾人可會同佢一齊合唱？小儀話：「係就好嘞，一定好好玩，好開心可以同佢crossover唱呢隻宣揚環保嘅歌。」
