前晚立法會流會，主席范太以個人身份公開道歉，其他黨派亦認錯，政客潮玩saysorry。立法會前晚辯論香港會展業發展，冇爭議性，好多議員發言後唔投票就鬆人，落區為區選拉票，提出動議嘅自由黨有四人缺席，副主席周梁話流會係「不幸」。
民建聯亦有四人玩快閃，公民黨最乖，六個議員走咗兩個，最離譜係民主黨，只得兩人留守，主席何俊仁話日後會指令黨員，萬大事都要返嚟投票。其他獨立議員都唔齊人，余若薇建議黨派君子協定，最少要有過半數議員留低開會，以免再流會出醜。八方記得每次流會都有人重提呢個建議，事實證明冇用。今次流會事件，反映區選選情緊湊，亦再凸顯動議辯論制度多餘，因為通過動議對政府冇約束力，大家口水一場，傾都嘥氣，何況投票？