堪輿學家楊天命喺佢個blog度預測，噚日同今個月29號，港股好大機會出現大調整，預測跌幅達700點。
上半場開彩結果──恒指噚日低開280點後回升，雖然一度跌到去低位28484點，但之後就反覆向上，收29298點，唔單止冇股災，全日仲升咗344點。
嗱，即使將噚日最低位同前日收市價比，都係跌咗470點啫，同700點仲有一段距離。
跟沽大期輸四皮四
最慘係，噚日一開市期指跌咗355點，去到28416點。如果你以為楊大師發功，追沽期指，咁就中伏，因為期指之後掉頭反彈，全日收報29293點，低位同收市相差877點，以「大期」50蚊一點計，咁就輸四皮四。
不過咁，楊大師可能真係估中，只係凡人參透唔到當中玄機。嗱，楊大師話喺今個月17同29號，大市會極有可能大調整，幅度係700點，但佢無話係兩日各跌700點喎，亦都冇話全日計抑或當日某個時段計喎。如果係分兩日跌，每日跌一半，咁噚日一開市期指跌355點，咪中咗囉！