日前聽到一些股民在公眾場合興高采烈講炒股，談到如何高沽低買隻1133，但卻越聽越唔對路，佢哋將哈爾濱動力（1133）講作哈爾濱電力之餘，還說如何與電力股比較，AH差價如何折讓大等等（哈動未有A股喎）。熱門國企尚且如此，假若他們熱炒不知名的三四線股，真不知後果如何。
正因如此，由國內散戶親自落場選股炒賣的「港股直通車」，一定要好小心至可以開行，避免散戶胡亂炒股之餘，亦要防止洗黑錢問題。炒股資金只能在指定銀行證券戶口買賣股票，理論上無問題，但若然買入之股票要供股集資，而資金最終用來買入一些不知名資產，同樣可以做到洗錢套現目的。所以，日後香港的監管機構要好小心審批每一單上市公司交易，壓力將越來越大。
條款定好之後，還要如何分配額度，令利益得以均分，所以直通車規模上限可能細到你唔信，日後直通車開行又如何？根本不是大市上升動力來源所在，實在唔明啲講股佬點解還以此解釋大市升跌。其實中央根本在加快審批基金QDII，一個閒閒哋都有40億美元，仲使靠散戶嘅零頭去推高大市？
散戶咪照單全收
日前有記者向有關官員詢問中投公司是否有買港股，更加反映新一代記者對國情認識之不足。中投成立資金靠國家儲備，儲備有部份來源自發國債去吸走市場游資，既然目的係排洪抽資，又點會用排洪資金鬥搶港股？中投會買的，一定是戰略性資源、對吸收金融人才有用的，例如Blackstone，仲要係到外國買平貨。
香港現在資訊氾濫，尤其到處財經節目，卻同時走出太多謬論，散戶吸收得太多，唔係好事。