香港仔幅地，呎價直迫九龍塘豪宅地，醒目嘅發展商就識得乘勢推盤，夾準時機。好似賣樓嘆慢板嘅恒隆地產（101），噚日就推售大角嘴浪澄灣。今時今日發展商賣樓都花盡心思，聲勢好重要，恒隆執行董事吳士元（Terry）呢頭去完歐美日韓路演返歸，未唞順條氣就要開工賣樓。
落本買樓捨我其誰
咁仲唔止，Terry一向人緣好，唔少老記同佢好熟，公關大員亦都老實不客氣，華華前日就收到call，「喂，Terry星期五生日，聽日推盤記者會之後，我哋喺董事屋預備咗個蛋糕同佢慶祝，記住嚟。」
風塵僕僕返香港，未嚟得切唞氣就要開工賣樓，仲要喺工作中做生日，兼吸引一眾傳媒好友到場影多兩張相，老闆朗尼陳啓宗請到呢個員工，一個字──抵！
其實，Terry瞓身為公司都唔止今次，上回君臨天下個盤推售，佢自己都身體力行捧場買番個單位。
瞓身宣傳數趙國雄
瞓身宣傳數趙國雄
不過，肯「瞓身」推盤嘅執行董事又點止得Terry，地產界最唔錫身嘅執董，首推長實（001）趙國雄，佢最鍾意扮鬼扮馬，佢嘅造型華華直情要用「技驚四座」嚟形容，最經典係sell畢架山1號時嘅楚留香look；仲有年頭喺海雲軒扮將軍，喺記者會度拎住把劍劈吓劈吓。
如果，間間發展商嘅執董都好似老趙同Terry咁，發展商就唔使落重本搵幾大風水師，甚至連環球小姐都請埋去賣廣告啦！
不過咁，又唔係吓吓都要瞓身為難自己，好似盈大（432）李智康同會德豐地產（049）黃光耀咁，就以不變應萬變，次次都用美人計──李智康鍾意請名模撐場，黃光耀就多數搵唔同造型嘅model，總之都係為咗博見報。
電郵：mailto:[email protected]
