前晚落咗場雨，天氣即刻冷咗唔少，不過講冷，就點都唔及前晚嘅歐洲國家盃外圍賽咁爆冷，輸到我求大俠心都寒埋，幾乎要唱番句：「冷得我騰騰震！」
上盤客輸鑊甘
前晚嘅歐國外簡直可以用由頭爆到尾嚟形容，由頭場葡萄牙險勝主場嘅哈薩克2:1開始，為輸死上盤客揭開序幕，跟住到英格蘭、蘇格蘭、瑞典及德國等，上盤客真係喊得一句句。
就我求俠呢個荷蘭躉而言，荷蘭主場只能以2:0擊敗弱陣嘅斯洛文尼亞，就係輸得最甘，因為足智彩呢場係開荷蘭[-2]㗎！而且，荷蘭呢場雖然全取3分，但都付出沉重代價，3名年輕中前場主力雲達華治、洛賓同尹佩斯都勇戰受傷，暫時都未知要唞幾耐
尹佩斯雲達華治影響大
除咗左翼洛賓今屆唔係效力嘅西甲球隊皇家馬德里必然主力外，雲達華治同尹佩斯受傷，就真係對效力嘅漢堡及阿仙奴影響幾大。喺前晚扭傷膝頭嘅尹佩斯，現時已經可以話係英超球隊阿仙奴前線嘅大佬，兵工廠喺周六嘅英超聯對手雖然只係下游嘅保頓，但話晒對手有剛炒領隊嘅變數，跟住阿仙奴又要踢歐聯，迎戰布拉格斯拉維亞，如果尹佩斯唔出得，都咪話唔大鑊。
雲達華治鼠蹊受傷，就對德甲漢堡影響更大。因為雲達華治可以話係漢堡嘅靈魂，又係球隊嘅12碼劊子手同「首球王」，今屆喺聯賽為漢堡上陣8場就入咗7球。雖然漢堡喺星期六嘅對手係今屆表現大跌watt嘅史特加，不過話晒史特加都係上屆冠軍，加上史特加近3次鬥漢堡全勝，如果到時雲達華治唔出得，漢堡睇怕都係咁先。