呢幾日，孫柏文睇咗啲嘢，仲要重複咁睇，不過都係唔明。大家可能會問，係咪前幾日諾貝爾經濟獎，講嘅「如何設計資源分配機制理論」？唔係。嗰樣反而睇得明。
我睇唔明嘅嘢，係一樣叫做「一目圖」Ichimokuchart嘅東西。「一目圖」係一種日本人發明嘅技術分析方法。技術分析我已經唔係好熟，唔好話呢隻「一目圖」。
咁點解我要研究「一目圖」？原因係呢幾日有好多套息交易，最喜歡追捧嘅投資工具，例如澳元、紐元、白銀，都面對下跌壓力。惟獨黃金冇。經過我調查之後，原來根據上個禮拜五收市價，用「一目圖」分析，黃金現在出現「強力買入」訊號。以下為大家提供黃金嘅「一目圖」（見圖），不過唔好問我點解、點睇，因為我真係唔識。
點都好，因為「一目圖」喺日本散戶中大受歡迎。所以聽聞，呢幾日好多日本師奶掃黃金。講真，祖國散戶嘅資金係咪勁？係。不過真係拍馬都唔及啲日本師奶。大家試諗吓，你估祖國人民買LV手袋多？定係日本啲姐姐多？睇嚟黃金想跌都難。
金手指網誌： http://phatdat.blogspot.com