葡萄牙人撤出澳門，威尼斯人進駐，超豪酒店同巨型會展場地開張萬人空巷迫到爆，隔住個海都令香港特首「文革曾」如臨大敵，指令高官過大海刺探軍情。噚日澳門舉行聲稱歷來最大規模國際貿易投資展覽會，八方去實地視察，要穿過賭場行大約10分鐘，先抵達威尼斯人度假村會展中心，好彩八方唔好賭，否則隨時去唔到。
土產、內衣褲、名車乜都有
入到會場，八方不禁嘩一聲，事關成個場有1.8萬平方米，大過香港會展成倍，連機場亞洲博覽館都差一皮。根據主辦單位資料，共有889個參展攤位，逐個行勻睇一睇，隨時要行足一日。參展商嚟自31個國家地區，八方喺場內恍如置身聯合國，不過更似行緊大笪地，事關有啲內地公司，竟然喺堂皇展館內擺地攤，掛出「爸爸」、「弟弟」擺賣，十足女人街、花園街。
展覽會主辦者似乎較重視攤位數量，八方見到場內唔少人擺檔賣土產，澳門手信名店咀香園、鉅記、車厘哥夫都有參展，江西米粉、福建茶葉、茅台「土炮」、咖啡以至凍肉都有得賣，搞到八方以為去咗工展會，差在冇工展小姐招呼。行行吓，竟然見到個皇帝同妃子、貴人、小主喺架「波子」跑車旁邊指指點點，連皇帝都入場咁犀利？原來只係幾個歌舞團演員，佢哋派傳單時順便昅吓名車啫。
租金平香港會展三分一
八方同幾個參展商傾過，有人指個場又大又新又靚，參展商立立雜雜冇所謂，最緊要丁財兩旺，不過配套設施稍嫌不足，接駁交通尤其需要加強，否則冇人嚟傾生意，個場金造都冇用。生意人向錢看，港商李國璇話，呢個場有不足之處都可以接受，事關租金平香港會展三分一，又冇香港貿發局咁多限制。澳門出年2月首辦國際珠寶鐘錶展，珠寶商林志強期望好大，佢話威尼斯人有度假村，大家斟生意時比較relax，成事機會大好多㗎。展覽噚日開始，場內人頭湧湧，傾成幾多錢生意則係未知之數。
商人大讚澳門會展場地，可見文革曾唔係過慮，有關方面真係要諗辦法應付。貿易發展局發言人承認，會展平均租金的確貴過澳門，不過貿發局會資助海外買家嚟香港，亦設法擴建會展場地，同時開拓新題材展覽，下星期首辦運動用品展，就係希望食住奧運條水，而香港着重知識產權保護，亦係優勢之一。