中證監前日透露紅籌發A股就快掂，以及研究AH股互換，呢個消息不得了，喺花旗嗰邊啲港股預託證券即刻狂升，昨日返到嚟香港都唔失禮，隻隻大股都大幅高開，恒指仲破埋30000關創新高，不過，呢個只係上半場，跟住港股倒轉頭插，最後好勉強先升得166點收市，日線圖嚟支大陰燭，單日轉向，都幾曳，不過，好彩成交唔算大。
正股破位睇5.8元
聽到同一個消息，國內嘅同胞就完全唔同反應，A股同B股齊齊下挫，股民驚AH股差價收窄，咁A股就可能會大幅下挫，當然，H股升就梗係掉轉頭諗啦！不過，俊樺就覺得好得意，點解收窄差價一定係A股跌，H股升呢？點解唔可以係H股升多啲A股升少啲呢？又或者係AH股齊齊跌，不過係A股跌得多，H股跌得少呢？大家會唔會有太多一廂情願呢？咁唔係話邊個發展會機會大啲，而係要清楚凡事都有唔同嘅可能，真金白銀掟落去玩一廂情願，好危險，炒股唔係咁簡單，大家想贏錢，一定要做多啲功課。
駿威C輪1240：駿威（203）昨日好省鏡，升8.7巴仙收市，高位仲見過5.40元，「摩笛」奏起果然不得了，大摩睇6.46元，駿威即刻生猛晒，大成交升返上10日線樓上，下禮拜有力再試5.40元，破位睇5.80元，可以買啲C輪1240，昨收1.25元，槓桿率4.1倍（有效3.3倍），對冲值0.8，正股升上5.80元，1240應該喺1.85元樓上，正股跌穿4.80元止蝕。