台灣直擊
台灣偶像組合棒棒堂上月來港宣傳，吸引數千棒迷迫爆商場，墟冚場面一時無兩，但昨日無綫拉隊到台灣遊樂場錄影終極版《味分高下》，嘉賓棒棒堂決戰港星郭羨妮和AmandaS.等，玩盡咬蘋果、跳大繩及啜麵條遊戲，雖然勝出兼贏30,000元港幣，但比起來港聲勢竟輸足九條街，僅得30名fans冷淡圍觀。
台灣偶像組合的神話大多紅海外不紅本地，從年前的F4到現在的棒棒堂也如是，上月棒棒堂六子來港出席觀塘apm商場活動，獲數千fans迫爆商場湊熱鬧，吸引力幾撼低所有港星，想不到棒棒堂在台灣的受歡迎程度卻難與香港比擬。
昨日棒棒堂出席無綫拉大隊到台灣美麗華百樂園錄影的終極特別版《味分高下》，與郭羨妮、AmandaS.、貝安琪、湯盈盈和黃宗澤等齊玩遊戲，竟得約30名fans圍觀，反應非常冷淡。
勝出贏三萬元
昨日節目甩皮甩骨，主持庾澄慶、味之天使「梳打」JJ賈曉晨和「啤梨」均告缺席，要由臨時拉伕、自稱「哈飲」的錢嘉樂夥鄧健泓主持，遲到45分鐘的棒棒堂六子傾力玩遊戲補數，與港星分組玩咬蘋果、跳大繩及啜麵條三個環節，結果二比一勝出，共贏30,000元港幣。
郭羨妮受歡迎
眾人玩遊戲時，棒棒堂曾大讚AmandaS.靚女，當她和郭羨妮玩跳大繩，卻被繩索勾着鞋踭，狀甚牙煙，後者更大叫「好驚」，黃宗澤即出茅招分散棒棒堂注意力，欲為落後的港星隊扳平，但最後還是由嘉樂仔鬆手提水，讓AmandaS.在啜麵條鬥長的項目勝出，令港星隊贏20,000元港幣。
不過口花花的嘉樂仔卻笑AmandaS.說：「你啜嘢咁犀利嘅？邊度學番嚟？邊個教㗎？」她回答是父親，嘉樂仔更大笑說：「爸爸教埋啲咁嘅嘢嘅？」早前因形容陳志雲為蜜糖惹風波的鄧健泓即打圓場說：「唔好講埋啲咁嘅嘢啦。」
昨日港星中以郭羨妮較受歡迎，今日她會隨隊到當地溫泉拍外景，晚上逛夜市時，庾澄慶將歸隊。監製錢國偉對於棒棒堂在台反應冷淡，無奈說：「叫佢哋做嘉賓係反應好，仲驚多人，但點知又唔係多人。」
採訪：李珮洳
攝影：仇志德
