遊大「棺」園　紙紮打鼓機

城中潮紙紮師阿志說，生死不相遙，他常去醫院送貨，一座大樓，這邊有人生、那邊有人死，像日出日落，落完又出過。
人類可以隆而重之為自己搞一個生日派對，為何不能相信死亡儀式能夠又美麗又有趣？因為萬聖節、因為重陽，棺材紙紮久旱登大堂，「紙觀賞．賞紙棺」，立體紙藝展點題6個大字繼續反轉思維，收縮棹忌擴張好奇，死亡用品一次過瑰麗呈獻。

記者：劉嘉蕙
攝影：陳盛臣

紙紮傳人阿志　死後可專心打機

歐陽秉志（阿志）雖非做「棺」，但擅紮，紮iPod、滑板車、Plasma紮到出名，今次展覽繼續發揮創意啓發死亡新觀點，將推出遊戲系列，由大型打鼓機到小型Wii都齊款，「死後沒工作，沒煩惱，所以可以是遊戲世界、潛水世界、天文世界……」他花了幾晚砌一個打鼓機，原來只是跟雜誌相執藥，「我未玩過，我唔鍾意玩。」日對夜對紙紮，有想過自己身後想要甚麼嗎？「屋仔、單車同音響。」整定畀自己？「擺得耐會變色。」咁教定人整？「整得冇我咁好。」咁點算呢？「我聽過可以寄存，現在燒定，日後提取。」咁𠵱家得閒整吓給自己的禮物囉？「冇位擺。」阿志說話，從不講多過5隻字，以上由多條問題湊拼而成。
阿志爸爸開紙紮店，從不把工作帶回家，他快樂地長大、讀設計，直到畢業後到店裏幫手，才懂驚，「第一次送貨到大禮堂，戴了幾串佛珠，不過送多幾次就慣，現在經過一條鹹魚都冇事。」有冇見過嘢？「冇。」試過有阿伯為死鬼老婆訂電動輪椅，老婆報夢話收到，阿伯來向阿志道謝，覺得點？「冇嘢。」信有陰間報夢嗎？「又唔係我見到。」會覺得自己做紙紮其實都幫到人嗎？「我有收錢。」

■阿志手上的紙紮NDS，全副刊同事都信以為真。

物業永恒好賺

傳媒叫他藝術家，說他打破傳統，他說自己不過「有人訂就做」，「一半商業，一半興趣。」他試過拒絕客人要求，「有人訂電動牙刷，太細件。」嫌冇挑戰性？「係叫唔到價，永遠是屋仔車仔最多人訂，滑板車最近都唔興。」人一生能擁有的東西，阿志大部份都弄出來了，還有甚麼想做的嗎？「氫氣球。」幾時做？「冇位擺。」不做紙紮想做甚麼？「做記者幾好，周圍影相，問問題。」好啦，唔該晒，拜拜。
15分鐘後我收到一個短訊，「小記者，我想到要做咩喇……我要做一間紙紮部屋……入面所有用品都是紙做的。」下款是阿志和笑臉。成晚，這條問題問得最抵。

■PS3再加Wii，以為阿志定是標準機迷，否定的答案好詭異！

■紙紮新品晒冷，尚有望遠鏡、潛水氧氣筒及蛙鞋。

死過翻生阿全　棺材打開見草地

幾何有棺材做畫板？死過翻生的鼻咽癌康復者夢特嬌‧全（阿全），美化了死亡，點綴了棺木，為棺材黐草皮。
「之前跟一個婆婆談起，她喜歡大自然，說死了要瞓草地，一般棺木入面通常有絹布床，我改披草地當床。」棺面蓋，她畫了一個孕婦，下身被蛇纏，又有長髮披面的迷惑眾生，「一般人想像死亡很恐怖，好像被命運擺弄，就好像生仔，未生過以為好痛，其實沒有人體驗過死亡，它未必如想像中可怕，揭開蓋，可能是另一個美麗新世界，得到一個新的生命。」阿全強調，她並非鼓勵人自殺，只是毋須為未知而恐懼。

■阿全去年出書，現時努力畫畫、做DJ，「以前我學人食煙、飛車，話想做導演，其實唔知自己做乜。」

食擦紙膠加絲帶

阿全曾經很接近死亡，3年前她患鼻咽癌，那時她22歲，正值女孩子最好的日子，她做化療做到面燶、頭髮脫光，成口痱滋，「肚餓食碗魚蛋河，也像吞『擦紙膠加絲帶』，抗病過程痛苦到你根本唔得閒諗死。」康復後，癌病陰影揮之不去，「鼻咽癌康復者聞到煙味會流鼻血，每次見血，我都擔心自己舊病復發，有一陣子，我甚麼都不敢吃，日日食齋。」她今天很精靈，看不出曾經病過，她說，死亡不可怕，但活着的日子還是要珍惜，也不要隨便剝奪別人健康的權利，「以前自己食煙，看到人家用手掩鼻，會鬧人哋扮高尚，現在才明白自己好自私，好多做餐廳、工廠的阿嬸，日日聞二手煙不敢出聲，搞到鼻咽癌，做人要為意自己每一個動作，都可能影響到身邊的人。」

■對鼻咽癌康復者阿全來說，是次展覽設計棺材，別有一番體會。

寰宇奇棺

棺材是人生最後一張床，肩負「陪遺體火化」的重任，今次展覽，除了夢特嬌‧全，聖雅各福群會還交葛民輝、MC仁、小克，一人一副紙棺，詮釋死亡新角度。此外，大會更特地從外國及國內引入幾款紙棺。事關政府近月引入紙棺，處理無人認領屍體，宣稱較一般木棺環保，耗燃料少。不過中國人重視葬禮習俗，由木箱變紙箱，心理一關，都幾難過。今次展覽，不妨當睇示範單位。