最危險嘅地方，可能最安全，反之救命嘅地方，隨時危機四伏攞你命。唔係講緊醫院事故頻生靠害病人，而係醫院係工傷高危之地，打針開刀、搬搬抬抬好易損手受傷，醫管局05年起喺九龍西、新界東及新界西三個聯網實施「職業醫療關懷服務」，其中九龍西聯網服務小組，更奪得第六屆香港職業安全健康大獎金獎。
攞獎嘅蘇顯斌醫生話，實施服務後，近兩年聯網工傷數字降低咗近兩成，員工請工傷假嘅日數則減少近三成。呢個服務規定每個聯網要有一個負責醫生加三個「關懷經理」，負責推廣預防工傷活動，亦會安排工傷員工睇醫生，等佢哋盡快康復，唔使放咁多病假繼續開工。