無綫劇集《溏心風暴》口碑甚佳，更掀起全城溏心熱，大細契李司棋同關菊英更因而人氣急升，陳豪仲憑「得得地」角色有望問鼎今年無綫視帝一獎，有見及此，無綫打算原班人馬拍攝《溏心風暴2》，但新劇就飛咗狐狸精蒙嘉慧，改由徐子珊頂上，而《溏心2》會繼續以家族情仇為故事骨幹，但背景就由鮑魚海味舖變做月餅餅家。
演員燒烤作樂
前晚《溏心2》喺屯門一間私人住宅拍攝節目巡禮片段，大鮑夏雨因為登台缺席，而新加入嘅徐子珊又身在雲南拍劇，不過其他演員包括陳豪、李司棋、關菊英、陳法拉、鍾嘉欣、阮兆祥、楊怡同黃宗澤等都有到場拍攝。
現場佈置成中秋晚會，掛上燈籠等裝飾，並安排佢哋燒烤賞月，場面熱鬧。而楊怡、黃宗澤同陳法拉更寓工作於娛樂喺現場燒烤作樂。而編審張華標同監製劉家豪都有親自監場，參與拍攝。
嘉欣又病又嘔
馮仁昭見鍾嘉欣拍攝時無厘神氣，噚日就打去問候吓佢，嘉欣話：「其實自己發燒，冇乜精神，今日都又病又嘔，所以先冇同大家燒嘢食。」至於喺現場跳跳紮嘅楊怡，被問到大鮑夏雨缺席有冇感到失色時，佢就話：「都有啲㗎，佢係重心人物，不過觀眾唔使失望，續集佢一定有份。」
