中國大陸人民久已不讀歷史，大陸出版嘅歷史書每好引用馬列、階級鬥爭論批判一番，先至再講中國史，雖賢者不能免。改革開放以後，情況似有改觀，但仍書本不可盡信。讀中國歷史，不妨先讀戰前出版嘅中國通史書籍，如呂思勉，傅樂成，錢穆等學者嘅著作先。
錢穆先生一九三三年在北京大學任「中國通史」講席，學生要求發講義，錢先生編寫參考材料，編吓寫吓，去到一九三五年，編寫成一百萬字，一九三七年七七事變，北大師生南逃，遷往雲南，學生無書可讀，錢先生乃將積存材料重複改寫，在「不得四天之寧定」嘅環境下，苦無參考書之下，到一九三九年六月卒寫成《國史大綱》，出版後一紙風行，成為國史經典教材，曾特首若誠心在香港推行國民教育，錢先生此書不可不讀。
搞國民教育，無非想學生愛國而已。怎麼樣愛國？錢先生《國史大綱》引論有云：「若一民族對其已往歷史無所了知，此必為無文化之民族。此民族中之分子，對其民族，必無甚深之愛，必不能為其民族真奮戰而犧牲，此民族終將無爭存於並世之力量。今國人方蔑棄其本國已往之歷史，以為無足重視；既已對其民族已往文化，懵無所知，而猶空呼愛國。此其所愛，僅當於一種商業之愛，如農人之愛其牛。彼僅知彼之身家地位有所賴於是，彼豈復於其國家有逾此往之深愛乎！」
又云：「故欲其國民對國家有深厚之愛情，必先使其國民對國家已往歷史有深厚的認識。欲其國民對國家當前有真實之改進，必先使其國民對國家已往歷史有真實之了解。」
不讀中國歷史，愛中國不知從何說起，唔怪得香港回歸前後，香港出現好多忽然愛國派，特別係政界與商界人物成日講青年人要愛國，令人大惑不解。哎吔，原來史學大師喺七十年前已經一語道破，此種愛國，乃係商業之愛，今時今日好多香港愛國商人之身家地位有所賴於是，唔信可以問吓一啲香港區人大/政協與特區政界高層。特首啊特首，如果推動國民教育而唔需要學生讀國史，大家瞇埋眼講商業愛國啦！