「隱形富豪」鍾楚豪前日單拖走出嚟，批評市建局以每呎8,508蚊收購嘉咸街業權出手太低，除咗自組名為「嘉咸街社區建設有限公司」外，仲聯同發展商向市建局下戰書反收購，表示可以畀多5%呎價業主，街坊市民無不嘩然。
市建局向來被指欺壓小業主，今次反被人挑戰，鍾楚豪究竟何方神聖？佢噚日主動同傳媒飯局，為營造好形象，自爆發迹背景。佢自言廿幾年前做地產經紀，肯摶肯捱轉數快，所以成績唔錯，仲獲景賢里前業主邱木城賞識，借錢畀佢買咗荃灣力生廣場兩間地舖，一直揸到𠵱家收租，回報翻幾番好和味。佢又透露廿幾年前新地郭氏出價7億買景賢里，但邱家唔賣。
同景賢里前業主同鄉
外界質疑鍾楚豪財力有限唔夠市建局撼，佢表示背後有幾個合作夥伴，隨時可以攞一、兩億現金出嚟，仲有銀行肯借10億畀佢，合作「拍乸」係邊個就不願透露。不過佢輕描淡寫咁話，佢同邱木城係潮州人「格忌冷」，故當年一拍即合，其他「格忌冷」有冇關照佢，真係充滿想像空間。
鍾楚豪陣營就算彈藥充足，要揮低市建局都唔易，因要市建局有《土地收回條例》呢把尚方寶劍，可以強制重建範圍業主交回。鍾楚豪話，若有六成業主支持佢，就會要求特首介入，否則拉倒摺埋公司，終止反收購計劃。八方慶幸唔係嘉咸街業主，唔使為5%傷腦筋。