名人寫自傳好平常，尤其嗰啲退隱江湖嘅；不過，仲喺股海搏殺嘅鄧普頓基金董事總經理麥樸思，就搞搞新意思，搵咗日本漫畫家，畫咗本自己發迹史嘅漫畫，仲講埋點解咁睇好新興市場。本漫畫唔平㗎，賣成15蚊美金一本，大概要117港銀。
剃髮沾財氣
最引起華華興趣並唔係佢點發達，而係麥樸思喺漫畫度披露自己嘅「光頭之謎」。原來麥樸思原本有一頭濃密嘅頭髮，但有一次佢將公司嘅貨擺喺屋企時，屋企火燭，結果啲貨付諸一炬，而佢喺救火時，唔小心燒親啲頭髮。
事後麥樸思嘅手下同佢講，中國有句俗語「大難不死，必有後福」，仲話「十個光頭九個富」，佢聽到之後就索性剃光頭，沾番啲發達運氣。光頭新Look，仲俾佢個靚女拍檔讚話似足荷李活明星尤伯連納，就係咁，光頭Look從此定形。
不過，華華仲有個疑問，就係麥樸思嘅頭髮係乜嘢顏色，佢係德國裔美國人，頭髮有可能係金色或者紅色，橫掂麥樸思都出漫畫自傳，點解唔登埋後生時嘅玉照，畀華華一睹佢有頭髮嘅英俊Look呢？