楊千嬅一連五場的紅館個唱，每晚都有新歡舊愛來捧場，前晚是最後一場，除了有緋聞男友古天樂繼續做嘉賓錫錫外，另一緋聞男友丁子高則連續5晚往紅館捧場，不過全晚高潮反而是千嬅給古仔驚喜，在台上準備了蛋糕提早為其慶祝生日。
楊千嬅前晚在紅館舉行最後一場個唱，來捧場的嘉賓有千嬅雙親、緋聞男友丁子高、袁彩雲與男友、林建岳前妻謝玲玲、杜琪峯、陳文媛與男友等。當千嬅演唱完《化》這首歌時，她鼓勵單身的朋友不要放棄，現場觀眾回應：「你都係！」千嬅聽後很得意說：「你又知我係單身？」
萬人賀壽好感動
到古仔出場時，全場氣氛熾熱起來，他與千嬅已變得極有默契地手牽手行足全場，然後古仔肉緊地雙手捧着千嬅的頭和臉，狠狠吻了三至四秒，走到台中央時，台下突然升上一個生日蛋糕，千嬅說：「古仔下個禮拜日生日，今晚我哋同佢預祝生日，呢幾晚真係好多謝佢壯烈犧牲嚟幫手。」又說：「唔好講咁多，大家一齊唱生日歌幫古仔慶祝好唔好？」然後全場為古仔唱《HappyBirthday》，令他感動不已。事後古仔接受訪問說：「由於事前冇人同我講，所以都幾意外，我都係第一次感受到喺紅館有萬幾人為我唱生日歌，今晚好開心，好多謝千嬅送上呢份驚喜畀我。」
恨緋聞好耐要還神
前晚因為是最後一場，歌迷在兩度安哥後始肯離開，雖然千嬅在台上一直強忍淚水，但一落到台就狂喊，之後她去到中環麗嘉酒店出席慶功宴，宴上她被問到丁子高與古天樂的緋聞，她說：「我同丁子高係傾得埋嘅朋友，嗰次佢買咗好多演唱會飛，咁約出嚟攞飛，飲完杯嘢諗住車佢返屋企，我唔識路佢咪幫我揸囉！古仔就係因為要同我喺台上營造浪漫故事，先令大家誤會。」記者再追問丁、古兩人會否有機會？她說：「所有單身男士都有機會！我都恨有緋聞好耐，𠵱家有緋聞傳吓，我媽都要還神啦！」
此外，楊千嬅昨日又馬不停蹄到港台出席活動，似乎沒有休息時間，她說：「係呀！我仲要去錄音。」
採訪：胡比
攝影：仇志德
