【記者張嘉雯報道】為進入名校，千萬家長前仆後繼、奮不顧身，但現實經常是「入得到，未必好」。Alice的兒子多年前入讀油麻地一著名小學，校園內的競爭沒完沒了，令她感到前所未有的壓力，出現心跳、呼吸困難，逃避跟其他家長見面，更企圖跳樓自殺，最後證實患上焦慮及抑鬱症；最令人驚訝的是，她的兒子不但成績不差，而且年年考第一。
流言蜚語超出負荷
「啲家長畀好大壓力我，成日追問我個仔嘅成績，當我個仔係競爭對手，周圍講話我個仔成績好，係因為我同校長熟，又話我個仔唔係讀名幼稚園，同自己啲仔女講話『冇理由佢得你唔得』，令我覺得好煩。」有家長更在老師面前打小報告，「成組人做project，啲同學嘅家長收起我個仔嗰份，話佢冇交，話我個仔唔合作，個老師覺得奇怪，打電話畀我，真係好離譜。」
種種流言蜚語，令Alice超出負荷，到孩子念小三時，種種病徵出現，「見到啲家長就即刻走，唔敢見人，好怕人提起個仔嘅成績，一提起就好驚，個心係咁跳，呼吸唔到，行行吓街成個想暈低，要搵嘢扶住，又心口痛，以為心臟病。」
壓力太大，Alice試過撬窗花跳樓，「覺得好唔開心，想死，點知個窗花好實，撬極都撬極唔開，我又突然間諗起個仔，唔捨得。」到其子升中，Alice為兒子選了九龍區一所名校，豈料班主任覺得名校「唔夠名」，「我覺得嗰間都幾好吖，但係佢話如果我揀呢間會影響佢哋校譽，叫我揀另一間。」結果母子二人在老師影響下選了一港島區名校，亦成功入讀，其子自此感到大為放鬆。Alice其後診斷出患焦慮及抑鬱症，前後拖延了六年。
易受家庭背景影響
Alice的主診醫生、葵涌醫院精神科高級醫生李永堅指，不少家長因為子女成績而非常緊張，Alice的情況也很常見。
他解釋，情緒病容易受家庭背景影響。一名23歲女病人，因被愛賭錢及經常拈花惹草的父親認為「腳頭唔好」，常被毒打；5歲那年，其母到醫院產子，父親只留下九塊餅亁給她和兄長分吃，「結果佢同哥哥九日無冲凉，好似乞兒咁。」病人其後對男人心生厭惡，卻遇上一腳踏三船的男友，結果患上抑鬱症，企圖跳樓自殺不果，今年初在母親陪同下接受治療。
為增加公眾對精神健康的認識，勞工及福利局聯同19個政府部門及非政府機構本月舉辦2007年精神健康月，詳情參閱： http://www.lwb.gov.hk。
如對這則新聞有任何意見，請即登入
http://professionalforum.atnext.com/hall
2007年精神健康月開幕活動
日期：10月21日星期日
時間：下午2時30分
地點：九龍奧海城二期地下北翼中庭
內容：
‧問答遊戲
‧專家講座/個案分享
‧攤位展覽，介紹家庭與精神健康，兒童、青少年和老人的精神健康及常見都巿情緒病
‧精神健康諮詢站，精神科醫生在場提供諮詢及解答問題
‧魔術表演
‧手工藝DIY示範
註：各區尚有多項活動，詳情可上網 http://www.lwb.gov.hk
資料來源：勞工及福利局