林家棟今年唔聲唔聲接拍了8部電影，其中聯袂無綫四虎合演的《兄弟》今日上畫。飾演警員的家棟為懲戒社團接班人陳奕迅（Eason），竟拉他入車廂狂揼對方何B仔，雖然Eason年前曾在台灣發生意外下體重創，「蛋蛋」少一塊，但仍任揼唔嬲，令家棟大感折服。
在劉德華投資的電影《兄弟》中，無綫五虎除梁朝偉外，其餘四虎包括華仔本人、黃日華、苗僑偉和湯鎮業均有份演出，林家棟則與華仔齊演正義警員，陳奕迅是社團話事人之子，也是警方眼中流着壞人血的狂徒，故家棟跟他上演連場兵捉賊之餘，其中一幕戲更要狂揼對方下體。
密密接8齣電影
日前家棟在尖沙嘴提起首次與Eason結戲緣，即大讚道：「嗰幕戲打Eason咕咕，係認真唔留力，我拉佢上車不停咁揼㗎。」Eason五年前演出台灣校園騷時曾意外傷及下體，一邊睾丸被切除三分一，但家棟指對方沒有要求他特別小心：「埋位時佢知有呢場戲，唔介意，拍攝時非常合作，我彈落佢度，都痛㗎。」
其實家棟今年共拍了8部電影，除已推出的《七擒七縱七色狼》和《兄弟》外，尚有《鐵三角》、《神探》、《江湖情》、內地片《大電影2》和兩部邱禮濤電影，可謂產量驚人，家棟卻說：「我平、靚、正，可能呢兩年大家對林家棟認識深咗，多咗信心試我呢個演員，同埋我呢個年紀嘅演員少咗啲啫。」
「由頭到尾係工具」
不過林家棟早前接拍王晶執導的《七》片時，有指他由性格演員翻兜拍搞笑商業片，他說：「唔係返轉頭，做演員係乜都要試吓，冇底線㗎。」梁朝偉演《色，戒》激情戲也無底線，家棟稱已捧場看偉仔演出，並說：「好佩服、好欣賞，演員會有心理障礙，首先要說服自己，拍呢啲需要好大勇氣。」不知家棟有沒信心拍攝激如偉仔所演的情慾戲？他笑說：「睇吓係乜，隨時可以，我冇界限畀自己，我由頭到尾都係工具，生出嚟就係咁，接生嗰個都睇晒啦，對我嚟講，劇本好、對導演信任就得。」
採訪：朱倬誼
攝影：陳順禎
服裝：A/X
髮型：TimChengofILColpo（TST）
