香港仔拍賣地皮，成交價高達五十七億，地皮呎價去到八千幾蚊，高得驚人。但南區有地鐵概念，又話近海，食正股市暢旺條水，地產三劍客（信和、嘉華、南豐）越戰越勇，再一次橫掃對手，並不令人稀奇，只望地產向好，唔係虛火上升啫。
經紀Ｋ就話唔係虛火。佢喺星期六到西九凱旋門睇樓，發覺人頭湧湧，令佢誤會有新樓盤開售。凱旋門有唔少單位出售，睇樓之人多到離奇，價錢亦企硬，連向內街低層五百呎啲單位，叫價都在五百萬或以上。邊啲人買呢？左丁山話：「都唔使問咁多咯，有本地人、有操外省口音嘅同胞，總之買樓如買菜。」
此乃財富效應。股市升得咁快、咁耐，唔少人沽貨賺大錢買樓，十分正常，西九龍樓盤概念十足，係將來交通樞紐，大商場所在地，文娛藝術設施中心，投資銀行新辦公地段，係目前香港最熱門地區，難怪經紀Ｋ心郁郁想買番一兩間收租。
冇喺股市賺大錢嘅，唔使恨，憑真本事打工捱番嚟嘅儲蓄，邊度捨得用幾百萬買一個西九小單位呀，嫌錢腥咩。施老闆話中半山富匯豪庭嘅單位，近五千萬銀一間，近日俾人掃貨，幾乎掃清光，錢從何來毋須追查，股票一日不跌，豪宅價必定升完再升。地產Ｆ話擎天半島地段係最佳炒樓首選，佢留意到圓方商場（TheElements）開業後，人流有十萬人次，對廣東道威脅甚大喎。
睇清形勢，○七會否係九七翻版呢？保守派有啲驚，歷史數據派已經投晒降，逐步退出市場。但新錢不斷湧入，股市日日成交去到千七億元，保守派越沽越升，已經唔識分析。目前係未來派世界，相信未來，相信中國，相信呢次係唔同啲（thistimeisdifferent）嘅勇士，一於向前衝呀！外國投資有句格言，當狂牛向前衝嘅時候，你只能在後跟住隻牛向前，唔好站着不動，否則會被狂牛踩死。如果有隻熊追你，最好向山坡碌落去，博隻熊落得冇你咁快。現在狂牛當道銳不可當，最緊要順勢唔好心郁郁去沽空幾張期指呀。