沈殿霞（肥姐）𠵱家仍然喺瑪麗醫院留醫，愛女鄭欣宜連日衣不解帶悉心照顧佢，而肥姐嘅病情暫時穩定落嚟，不過佢一班好友好似陳淑芬母子、前夫鄭少秋、狄波拉、張徹太太同欣宜嘅外籍男友等，差唔多日日都嚟探佢。
「送生果，生生猛猛」
秋官噚日下晝5點半嚟到醫院，佢抽住一袋蘋果嚟探肥姐，佢一出𨋢見到守候嘅傳媒就話：「啲記者越嚟越少嘅，係咪追咗Joyce（鄭欣宜）出去？」問佢帶咗乜嘢嚟探病？秋官話：「生果，生生猛猛。」到底水果係官晶華嘅意思，定係肥姐叫佢帶嚟？秋官就話：「唓，邊有人叫人買嘢，官晶華叫我買嚟。」究竟肥姐現階段情況點樣？佢話：「好，精神呀！」秋官離開時，問佢有冇批蘋果畀肥姐食？佢話：「冇。」係咪怕官晶華鬧？秋官解釋：「老婆叫我買嚟，好多人喺病房，我聽個女講話肥姐鍾意食蘋果同蜜瓜。」秋官話雖然有見醫生，但就冇問肥姐幾時可以出院。
肥姐嘅胞姊同姊夫已經返咗香港，佢哋噚日一早都去咗醫院。可能見肥姐精神好轉，欣宜噚日話拎咗啲用具畀肥姐織冷衫解悶。張徹太太就喺中午負責送食物嚟，佢話：「食物係肥姐order嘅。」至於欣宜男友就逗留到下晝3點幾走。欣宜則同姨媽、姨丈坐車去咗山頂一個住宅度，至傍晚近6點，欣宜又返咗去醫院。
欣宜7點幾離開，問到肥姐織冷衫畀邊個？佢話：「媽咪織畀婆婆。」佢話自己都有下廚煮嘢畀肥姐食，但就冇機會煮畀秋官品嚐。
