胡杏兒和汪明荃（阿姐）合演、以西片《穿Prada的惡魔》作藍本的《我的野蠻奶奶2007》，暫定為無綫08年頭炮劇。劇中飾演時裝雜誌女強人的阿姐靚衫多籮籮，做得新抱仔的杏兒為襯對方當然不失禮，獲名牌Valentino包起她全身，贊助服飾勁達100萬，難怪無綫要搵專人開房，負責看管兩婆媳的靚衫。
胡杏兒、汪明荃和黃宗澤05年合演的古裝劇《我的野蠻奶奶》，當時播出收視口碑雙贏，無綫食過翻尋味，早前出動原班人馬再演故事酷似西片《穿Prada的惡魔》的時裝版《我的野蠻奶奶2007》（暫名），據知暫定於明年初推出。
潮媽自費買靚衫
劇中胡杏兒飾演女警，平日打扮極求其，但自邂逅時裝雜誌廣告部營運主任的黃宗澤後，飾演黃宗澤潮人媽咪兼雜誌總編輯的阿姐誓要令山雞變鳳凰，將未來新抱仔打造成名媛淑女，故兩婆媳將展開名牌大鬥法。早於拍劇前，阿姐已自費六位數字買Armani及YSL等私伙靚衫，杏兒則獲國際名牌Valentino贊助全身服飾，包括逾50套服裝、手袋及皮鞋等，總價值近100萬，日前她在電視城穿上一身名牌服裝時，也確添氣派，即變上等人。
闢專房鎖好服裝
由於服裝太貴，無綫要安排專人開房看管杏兒和阿姐的服裝，杏兒笑說：「其實喺開工前，公司已經幫我安排好啲衫，仲特登鎖喺間房仔度，雖然擺服裝間都好安全，但都係謹慎啲，唔見一件成幾千蚊㗎。今次有好多靚衫着，咁就梗係開心啦，但開工時要小心啲，唔好整爛，我都幫襯Valentino買咗個黑色漆皮袋㖭。」
不過杏兒就笑稱始終是阿姐最靚，她說：「我點比得上阿姐咁華麗？有啲衫好激、好誇，但又好啱佢，佢着到，好有自己嘅魅力。呢次再合作大家亦都好開心，拍到最後一日時，阿姐送咗隻YSL戒指畀我，咁我、Bosco（黃宗澤）同阿姐都貪靚，阿姐仲話搵日一齊去shopping，行吓街，因為我哋都應該好少機會可以有第三次合作。」
採訪：朱倬誼
攝影：陳志嵐
