在圈中人緣甚佳的沈殿霞上周突然在家暈倒送院，經過醫生搶救後情況已好轉，昨日更出院返家休息，她的好友對此都感到安心，並不約而同千叮萬囑肥姐要戒口。
張耀榮：
我都有接到肥姐出院嘅好消息，佢最緊要食啲有營養同健康嘅嘢，好似燕窩，不過大閘蟹就咪食啦，肥姐始終係病人，唔食多啲嘢邊有氣力，佢最好係少食多餐，咁樣會吸收得好啲。
李香琴：
我呢幾日唔去探肥姐住，等佢唞番吓先，病人最重要係休息同戒口，做乜嘢要咁為食？我下次見佢時會再勸吓佢唔可以亂食嘢。
胡楓：
肥姐出得院，呢個真係好消息，我等陣要傳個短訊問候佢，呢幾日都盡量唔探佢住，等佢好好休息吓，大家講心嘅，肥姐係會明白。
甄珍：
暫時不會亂煮東西給肥姐吃，因為不清楚她甚麼可以吃、甚麼不可以吃，或許過幾天待她精神一點，我們才到她家探望一下。
陳志雲：
公司落實頒發「萬千光輝演藝大獎」畀肥姐，會睇番佢健康狀況，又睇佢想唔想上鏡，可能佢想將最好一面畀觀眾睇，總之點樣方法頒發公司仲未決定。