烏克蘭上周六俾蘇格蘭擊敗後，篤定出局，唔知其他人點諗，但車路士嘅烏克蘭國腳舒夫真高，日前就口不擇言咁踩意、法而抬蘇：「我寧願蘇格蘭入決賽周嘞！」
「生銹軍刀」喺車仔俾球迷噓到飛起，但返番國家隊，就連續兩場國際賽有波入，可惜隊波唔爭氣，作客蘇格蘭連1分都冇。所以，「生銹軍刀」心生歪念，竟然立下狠毒預言：「蘇格蘭𠵱家威到盡，又大權在手，決賽周寧願睇見佢哋啦！」
鋪定後路投身蘇超？
言語間聽落好平凡，但大家唔善忘嘅話，都知「生銹軍刀」喺AC米蘭度過光輝歲月；而且佢不諱言同意大利隊友如加度素、尼斯達、派路等老友鬼鬼（同大哨係friend，但兩人唔係喺AC混熟），所以此言之一出，等同閂埋自己回歸意甲嘅大門……求大俠諗諗下，「軍刀」係咪預知自己喺英超時日無多，不如投向蘇超些路廸或格拉斯哥流浪懷抱呢？
提起蘇格蘭，佢哋禮拜三會造訪格魯吉亞，客W罕有地熱至1.68倍，我求大俠都幾戥佢哋擔心，事關佢哋陣內正選守將侯頓及中場史葛布朗倦勤，前鋒加利奧干拿同中場麥高洛治停賽，似乎有被過份吹捧之嫌；然而，佢哋只要喺未來兩場攞4分，就可以重返闊別咗10年嘅決賽周舞台嘞！
英蘇世仇咪亂諗
那邊廂，意大利主帥鄧納東尼當「軍刀」冇到：「我可以話，蘇格蘭首循環贏格魯吉亞，只係靠運氣幫助，絕對唔係優勝劣敗。」「軍刀」或者以前上歷史堂時唔太留心，以為撐一撐蘇格蘭，喺英超會獲得民心，之不過蘇格蘭同英格蘭根本就係宿世仇家，呢鋪「軍刀」隨時前無去路，後有追兵！