18/10/2007.....
天晴
最新動態
𠵱家全民皆炒股，形勢如此，勸人咪買盞俾人鬧，不過有一樣賭博，我都越玩越心淡，就係六合彩。
賭錢都要賭得精明識計數，一見勢色唔對，應該識全身而退，人生短暫，大把有意義嘅人與事等緊你去做同照顧；唔好以為買六合彩輸極都係婆仔數，仲有機會一鋪翻身，呢啲係賭仔美麗嘅夢想而已。
㩒一㩒計算機，六合彩一個禮拜開3次，若果你好神心每次進貢20蚊，買足5年而冇回報，原來要花掉約15,600元；不過如果你分開5年儲錢，計每年回報5厘息，原來一個禮拜儲60蚊，5年後已收回約17,000元，到時都仲夠雙人日本遊啩。何況有幾多人真係會一朝發達，畀你中番3個字收番20蚊安慰獎，下次咪買40蚊？要做善事其實都有好多方法啫。
賭六合彩毫無捉路可言，旺盲門搞笑，花6蚊買份六合彩報仲笨；反而買波滿足感大好多，計捉路及近況，我聽朝起身小注捧戰意如虹嘅銀河單W好過，不過今晚有4,300萬金多寶，買埋今次咯。