劉嘉玲和梁朝偉這一對手牽手走過漫長歲月，互相扶持。偉仔主演的《色，戒》大獲好評，但有傳劉嘉玲十分介意男友在片中的激情床戲，她前晚出席活動時滔滔不絕解釋，激動大讚偉仔表現是「華人的光榮」，更不介意偉仔有沒有打真軍。
劉嘉玲前晚穿一身意國名牌Dolce&Gabbana冬裝，在灣仔出席寶馬陳列室開幕禮，她坐在價值120萬的M3coupe新車上進場，吸引了大批記者採訪。梁朝偉與湯唯在《色，戒》有三場激烈情慾床戲，嘉玲上周欣賞男友的演出後，其閨中密友透露她非常介懷偉仔的大膽演出。
嘉玲前晚一聽到記者提及《色，戒》，即滔滔不絕說：「睇咗，非常之好，我戥偉仔覺得好驕傲。佢真係做到我想像唔到，係冇形容詞可以用到，好多人睇咗小說都有幻想，偉仔演嘅易先生係滿足咗大家心目中嘅角色，而且係幻想到有靈魂，好難得，係佢事業上大大咁行前咗一步，我今次真係好高興。」
拍得痛苦
「成個人變得好陰暗」
片中有三場大膽床戲，問嘉玲作為女友會否妒忌或不高興？她說：「唔會，我對呢啲嘢有免疫能力，唔應該focus喺嗰度。偉仔演呢部戲，由年頭開始拍咗大半年，睇到佢係拍得好辛苦，好痛苦，脾氣又差，成個人變得好陰暗，佢今次為咗藝術徹底奉獻，演出嚟嘅易先生好感動，我好尊重佢。」
問嘉玲偉仔有沒有事前知會？她激動地說：「唔使講，我明白。我睇完片，第一時間sendmessage畀佢，恭喜佢，一個演員由0分做到90分係唔難，但由90分去到100分就好難突破，佢行到呢一步，係華人嘅光榮，中國演員嘅突破。」
嘉玲讚揚男友滿分，更指整套電影超越100分，至於男友那一部份最好？她說：「每個表情，比小說中嘅易先生演得更精采，簡直佩服佢，自己人都咁讚，真係非常好。」問她可接受到湯唯的演出？她說：「我唔知道，要一路拍一路試先知。」嘉玲提到偉仔拍《色，戒》時，整個人變得十分陰暗，她解釋說：「佢由頭到尾都付出好多，學國語，學做漢奸嘅眼神、身體語言等。當時佢脾氣好差，不過我𠵱家就明白，佢通常都係咁，拍《春光乍洩》時都係咁樣情緒變化，拍完就會抽離，見到我咪抽離囉。」
性器外露
「好睇、好真、唔尷尬」
偉仔拍《色，戒》豁出去，演床戲時連部份性器官都外露，嘉玲聞言即說：「係中國人電影史上比較突破，好睇，一啲都唔覺得尷尬，好真，係劇情需要。」她又指偉仔曾知會她看時要有心理準備。問到偉仔可為床戲不開心？她說：「其實佢拍成套戲都唔開心，因為壓力好大，尤其語言壓力，同埋成個氣氛好陰暗。」有指偉仔與湯唯的床戲假戲真做，嘉玲對此說：「你覺得呢？咁即係大家都覺得真啦，咁就成功咗，拍戲啫。」有否質疑偉仔打真軍？她說：「我冇質疑真唔真，冇所謂，大家睇得咁高興，拍戲係逐個鏡頭拍，而且全場好多人，點會enjoy？」
採訪：顏英儀 攝影：林德雄
最高蘋嬸
嘉玲對偉仔拍床戲持開放態度，唔知佢有冇諗過作藝術嘅突破呢？咁觀眾就真係有眼福啦！
