黃家強早前返回內地多個城市宣傳國語新碟《她他》，可惜原定9月中推出的大碟，因內地遲遲未出批文，令出碟時間一拖再拖，加上近日坐飛機又多番遇阻滯，可算黑仔。
黃家強由8月份開始便馬不停蹄到內地為全新國語碟《她他》造勢，今次宣傳策略有別於以往，就是大碟未推出就不停在內地做騷、接受電台及電視台訪問。
慘遭網友非法下載
不過原定於9月中推出的大碟，因內地負責發出批文的部門轉換人手，故此所有手續都要重新處理，家強無奈地說：「你都知批文呢啲冇得急，我哋所有嘢都預備好晒，只要批文一出就可以印碟，因為呢個原因之前我要帶一啲香港版嘅碟畀內地電台播。」
家強透露暫時仍未知確實的出碟日期，部份內地歌迷索性在網上購買香港版唱片，更有人將所有歌曲放上網作非法下載，他說：「今次真係好慘，有啲歌迷等到唔耐煩就上網訂，最慘係有人將啲歌整晒上網任人download，希望到時出咗正版碟，啲人會買番隻正版。」
商務客位變經濟艙
家強笑言近兩個月做了「黑仔強」，皆因他多次搭飛機都要滯留，試過一次由香港飛北京遇上打風，他所乘坐的航班竟飛到鄭州，家強說：「我嗰次足足用咗15個鐘先去到北京，之後有一次由長沙飛北京，上到機話架機有問題叫我哋落機，點知想去轉第二班機又冇晒機位，呢次我又等咗十幾個鐘先飛到，𠵱家我啲同事都怕咗同我一齊上機。」
不過令家強最氣憤是遇到不禮貌對待，他在香港機場辦理登機手續時，明明坐商務客位，卻被要求到經濟艙，他說：「佢哋話所有商務位hold晒畀VIP，但係我都係VIP，之後個職員話我唔夠高級，所以要降落去坐經濟艙。我都唔同佢計較，只係要求佢畀我坐頭一兩行，可以方便快啲落機，點知佢又話俾人book晒，佢啲態度好差，我上到飛機填問卷時叫個空姐幫我寫咗封投訴信。」
採訪：李珮洳
攝影：陳慧安
場地提供：THESTONEGRILL
