黎小田（右）噚日同衞蘭（左）、蘇永康同余安安喺九龍灣綵排「黎小田問我30年演唱會」。眾嘉賓將演唱關正傑、梅艷芳、張國榮同陳百強嘅名曲。衞蘭會演繹阿梅嘅《似水流年》，佢話：「唱梅姐嘅歌梗係有壓力，仲同大樂團合作，特別緊張。」蘇永康對獲安排唱關正傑嘅《大地恩情》感到開心，佢話：「多謝小田哥咁睇得起我，因為首歌幾難唱。」