每到年尾，又係各位玄學大師嘅出書旺季，要喺芸芸玄學「明星」當中脫穎而出，除咗要有料，仲要名堂夠響、多人講至夠人氣。好似堪輿學家楊天命咁，與時並進開咗個blog，仲好有吉士咁喺嗰度明確話畀大家知，今日同埋29號，港股出現大調整嘅機會極高，仲話跌幅有成700點。
咪住！700點？家吓恒指升到近3萬關，就算噚日回返586點，都收報28954啦；700點嘅跌幅，佔恒指都唔夠3個巴仙，簡直係小兒科。家吓個市日日咁大波動，幾百點波幅好濕碎，就算散戶如牛頭角順嫂，都會視為正常調整。
醒你賺三皮五
不過咁，沽一張「大期」，每跌一點可以執50蚊。如果楊大師講中，恒指真係跌700點，咁你跟佢買就執到三皮五，都咪話唔爽。
楊大師話，佢求得易經第15卦「謙」，即係話港股將會出現波動；而經佢計算所得，今日同埋29號，就係最有可能跌市嘅日子！
佢仲話06同07年，佢先後預測到北韓核試、日本七級大地震，同埋港股狂瀉，至於呢次準唔準？唔使等十年八年，今日收市先開住一半估。