高清電視廣播年底有得睇，小妹咁in，都打算買一部高清電視，但係邊啲啱用，都係要請教消委會老友。
老友話，𠵱家模擬電視制式PAL以垂直線數隔行掃描廣播，而傳統模擬電視嘅解像度約為640（水平像素）x576（垂直像素），高清電視當然清好多，可達到1920（水平像素）x1080（垂直像素）；而本地即將使用的高清格式就係720p（720線垂直逐行掃描）同1080i（1080隔行垂直掃描）格式。
消費者選擇高清電視，必須買可以支援720p或1080i嘅高清電視機，同埋可以具播放高解像度嘅能力，即係垂直線數至少有720p或以上（720、768、1080）。如果電視機支援視頻訊號與其解像度越接近，配合就越好，畫面越靚。
好似𠵱家全高清電視機嘅解像度達1920x1080，完全顯示1080p（1080線逐行掃描），主要係攞嚟睇藍光光碟，解像度比高清電視廣播嘅720p（720線逐行掃描）仲高，買部全高清嘅電視機應付高清廣播綽綽有餘。其實720線或以上都足夠。
逢周一至周四刊出