噚日南太主席顧明均開記招，話喺元朗牛潭尾幅地俾人非法佔用咗十幾年，用盡正途方法都收唔返，所以要打傳媒牌，希望對件事有幫助。話說塊元朗地喺南太其中一個股東入股時，當作入股嘅資產，面積大約8700方呎。
顧明均話之前同區另一幅地，有人出過呎價250蚊想買，𠵱呢個價計，塊地值二百零萬；不過，佢咁多年用喺官司同跟進事件嘅費用，差不多500萬，究竟為乜？
花500萬追二百零萬
佢話，南太喺93年突然收到規劃署通知，話公司未經許可改變土地用途，佢嗰時先知，原來塊地早喺93年4月之前，俾人非法佔用嚟做貨櫃場。咁多年嚟，佢搵過警局，但警方話呢啲係私人業權糾紛，唔受理。佢又搵過城規會、規劃署，次次都不了了之。
既然自己係業主，咁不如去法庭申請收地。結果法院判佢勝訴，於是佢叫律師帶埋法院執達吏同保安，3條友去收地，點知俾十幾個人圍住追打。最好笑係，佢哋搵測量師去跟，結果又俾人圍，搞到個測量師要走上山，遠「測」塊地，仲畀錢出動直升機，證明自己塊地真係俾人霸咗。搞咁多嘢，除咗想攞番塊地，最想就係「唔好再畀違規通知書我哋喇！」
噚日記招台上有4個位，但其中兩個「吉」咗，皆因南太用律師信邀請城規會同規劃署代表出席，但雙雙冇影；至於霸咗南太幅哋嘅公司，當然無代表到，但華華八到間公司嘅名叫做「永霸」，係咪好貼切呢？
對於顧明均嘅遭遇，警察公共關係科噚日書面回應話：「一般而言，警方接獲市民報案或求警協助，均會按既定的程序，以公平、公正的態度去跟進處理。假如有關事件涉及私人土地糾紛，警方會轉介相關政府部門作出跟進。假如案件涉及刑事成份，警方會跟進調查。」