前稱「漢寶龍蝦大王」嘅中能控股（228），上個月再以行動力撐轉型決心，豪擲4.9億人仔，買起內地民企富豪王建國私人持有嘅兩間四川鉛鋅礦產公司49%股權。唔知係咪呢個消息對中能股價冇乜刺激作用，中能噚日搵埋賣方王建國南下來港，再煲多次單交易。
見到王生揹住個「山西鋅業集團董事長」嘅職銜，記者行家梗係捉住唔放。佢話山西鋅業總資產有43億銀，舊年全年淨賺5億，除咗搞鉛鋅礦，仲有發電、化肥、白銀、硫酸等業務，瓣數多到數唔晒。至於係咪有意注資或者「借殼上市」？王總好老實話係有咁嘅想法，身為內地民企，要發展就要喺資本市場搵平台。
下次要股唔要錢
之不過，鉛鋅呢單刁係王生嘅私伙，中能又全部用現金買，正係一手交錢一手交貨，互不拖欠，就算間鉛鋅礦公司上市，都好似唔係好關你事噃！於是王生話，再同中能交易嘅話，會諗住攞股份，或者自己買中能股份，不過呢啲會係下一步嘅事嘞。
唔知係咪過早洩漏玄機，中能行政總裁陳偉強強調，冇借殼呢回事，記者會亦草草收場。王生事後補鑊話，注資入股係佢單方面諗法，會前冇同陳生傾過，嚟緊會透過唔同平台發展，唔排除09年A股上市喎！