噚日保利香港（119）宣佈，主席王軍辭任，由賀平接替。通告話，王軍係因為「希望重新調整其本身業務而辭任」。
點解華華無端端講呢個通告？首先，王軍係國家前副主席王震個仔，賀平就係鄧小平女婿，睇牌面，已經知唔係一般董事變動咁簡單。
敏感時刻敏感調動
何況家陣北京舉行緊「十七大」，有軍方背景嘅保利，喺呢個時間有重大人事變動，你話華華敏感定捕風捉影都冇所謂，好難唔令人另有聯想，究竟係咪中央有新嘅人事調配、利益重組呢？
其實，保利同王軍喺呢兩年都有好多動作，好似舊年中，北京中信宣佈王軍退休，以為佢從此卸下戎裝，點知佢今年7月入金榜（172）做主席，自佢主持大局，金榜股價短短3個月升3倍幾。
至於保利集團，今年初就有紅色資本家榮毅仁個仔、太子榮智健入股成為策略性股東，令保利成為全港上市公司中，最強大嘅太子黨組合。究竟保利嘅人事變動，有啲乜嘢implication？大家即管拭目以待。