無綫下月40周年台慶，詹瑞文趁勢推出舞台劇《萬千師奶賀台慶》贈興，為宣傳又扮港姐又扮無綫總經理陳志雲，沒想到竟辣㷫無綫遭封殺，原定為無綫主持的兒童節目突然被抽起，官方解釋原因是他亮相亞視接受訪問，但與無綫並無合約的詹瑞文認為此解釋極度荒謬，炮轟無綫太過霸道。
繼《萬世歌王》後，詹瑞文將於下月30日開始舉行13場歌影視三部曲之二的舞台劇新作《萬千師奶賀台慶》，玩盡古今不同電視人物，包括阿姐汪明荃、港姐和無綫總經理陳志雲等，藉搞鬼造型來反映香港過去40年的電視文化，而月前詹瑞文更以一身「師奶港姐」造型舉行記者會，身穿高衩旗袍展露肉腿，扮相爆笑啜核。
同情歌手
「好多人好似買TVB怕」
與此同時，無綫早於今年6月已斟詹瑞文合作主持一個全新的兒童節目，原定上星期拍攝宣傳片，但詹瑞文臨時接到通知取消所有演出，無綫方面指因詹瑞文亮相亞視，故決定取消合作，但詹瑞文認為自己並非無綫合約藝員，不受合約所限不能亮相其他電視台，故覺得這種說法非常荒謬，深信今次遭無綫封殺，其實與《萬千師奶賀台慶》有莫大關連。
詹瑞文日前接受本報專訪時說：「電視圈有啲好奇怪嘅嘢，我覺得TVB好霸道，有時工作上接觸啲歌手，無論佢哋幾忙都好，做做吓嘢都要趕去做《勁歌》，好多人好似買TVB怕咁。《萬千師奶賀台慶》絕對唔係醜化港姐、阿姐或者陳志雲，我《男人之虎》都扮過董建華，係以嘲諷形式去講一啲事情。
「今年6月TVB同我傾一個兒童節目叫做《DaDaDeDe精靈樂園》，希望我哋劇團做7集，同時負責埋劇本，雖然冇錢收，但因為教育小朋友演話劇、推廣話劇，所以我應承咗，之後又安排公司同事寫劇本同演出。原本plan好10月中開始拍，其間TVB同我講，叫我拍4個一分鐘嘅宣傳片，點知上星期TVB節目統籌陳小姐打電話畀我助手，話暫時要抽起同暫停我TVB所有嘢。有日我同電視台一個朋友食飯，佢話我俾TVB列入黑名單，TVB會將blacklist名單貼喺部門告示板上邊。
「吓？我做乜無端端俾人雪藏？有冇搞錯？我又唔係簽咗畀佢哋，做乜要雪我先？做乜咁霸道？TVB當日畀我嘅官方解釋，係亞視曾經喺記者會訪問詹瑞文，個訪問後來喺陶傑一個節目播出嚟。我覺得好荒謬，以前我都有上有線，完全冇講國語，點解有線出咁多次冇話blacklist？唔通我幫滙豐拍廣告、幫百佳配音，廣告喺亞視播又要blacklist？搵都搵個好啲嘅原因，唔好咁荒謬。TVB畀我嘅解釋完全唔合理，我覺得係《萬千師奶賀台慶》呢件事影響。」
唔恨合作
「扮陳志雲係因為hit」
詹瑞文越講越㷫：「我劇團係政府資助，當年我扮董建華嘅時候佢都未落台，唔通人哋睇到之後就cut我budget？我扮陳志雲係因為佢呢期hit，唔係嘩眾取寵，我覺得TVB好霸道，我劇團宣傳唔使靠TVB。陳志雲嘅《志雲飯局》都係將藝人私隱呈現畀大家睇，你睇吓阿Lam（林子祥）拍枱走嘅報道，問基仔（古巨基）有冇禿頭，呢個方式同揭藝人私隱嘅雜誌有乜分別？我唔恨上TVB，之前陳志雲同何麗全都搵過我做《有招出招》，如果我要喺TVB宣傳，一早已經上咗。
「作為藝術工作者，言論自由係好重要，作為電視台應該更配合藝術工作者，因為大家都係從事文化事業，我最嬲係叫咗同事籌備，佢哋話唔做就唔做，我會發信無綫要求一個合理解釋，否則嘅話好可笑，冇大將之風。既然TVB唔做（兒童節目），我要傾番個版權畀番我哋。」
無綫外事部助理總監曾醒明昨否認封殺詹瑞文，他在電話中說：「據我哋所知詹Sir用電視題材做舞台劇唔係第一次，TVB點會為呢件事唔高興？再講，詹Sir唔係TVB合約藝員，佢係絕對有亮相其他傳媒權利，TVB冇權干預。至於兒童節目合作事件，每個監製都有佢哋嘅處理權。」此外，《萬千師奶賀台慶》開賣首日票房即衝破《男人之虎》紀錄，成績理想。
採訪：李珮洳
攝影：葉君海
娛樂資料庫：喜劇之王玩盡名人
舞台喜劇之王詹瑞文，每齣舞台劇均絞盡腦汁玩盡城中名人兼諷刺時弊，過往他曾有過不少啜核造型，令人會心微笑。
舞台劇：《男人之虎》
簡介：扮演不同社會階層人士，包括「平庸大哥」及「伸凸手煲呔曾」等
舞台劇：《萬世歌王》
簡介：玩轉香港樂壇，扮演當紅歌手包括「郭富明」、「陳冠Day」及「洪祖兒」
舞台劇：《蛇鼠一窩》
簡介：故事涉及爭產事件，詹瑞文和妻子甄詠蓓更反串仿效龔如心和陳振聰的合照拍攝宣傳海報
舞台劇：《萬千師奶賀台慶》
簡介：反串扮演阿姐汪明荃
資料來源：《蘋果》資料室
娛樂資料庫：《囍趣台》玩高層播映無期
詹瑞文因玩無綫高層而遭封殺，其實無綫中人如錢嘉樂和林曉峰也曾遭同一命運，去年二人主持一個以扮嘢為主的搞笑節目《囍趣台》，不但已錄影食住《斷背山》話題大玩淫亂版《斷背心》，其後錢嘉樂又先後扮無綫新聞報道員趙海珠和高層何麗全，鄭敬基則扮陳志雲（圖），造型抵死。該節目原定去年3月晚上7時播出，但播出前一天突然被抽起，有指原因是主持扮無綫高層扮出禍，也有指首集《斷背心》太過淫亂，不適宜在合家歡時段播映，節目播映之日遙遙無期。
娛樂資料庫：中招藝人無數
無綫成立近40年，長期享有慣性收視，形成霸權主義，過往也有不少藝人因得罪無綫而遭封殺。
藝人：陳冠希
簡介：早前接受《東張西望》訪問時，剛承認與楊永晴拍拖的他被問及與黃立意的緋聞時，因不滿大罵女主持，有指無綫因此封殺他。
藝人：關心妍
簡介：04年因提供日本受訓的廣東話片段給有線娛樂新聞台播放，遭無綫封殺。
藝人：謝霆鋒
簡介：00年接受《時代》周刊訪問，曾公開批評無綫的音樂節目是垃圾，一度遭封殺。
藝人：陶大宇
簡介：97年因無綫拒絕加他5,000元人工而沒有續約，無綫便將他封殺。其後大宇過檔亞視拍劇，03年重返無綫。
資料來源：《蘋果》資料室
