股神李四叔嘅旗艦恒基地產（012），噚日出咗最新年報，四叔舊年喜事一件接一件，會唔會加人工都鬆手啲呢？
一睇之下，發現個個執行董事嘅董事袍金，唔係減咗就係冇變，好似四叔、兩個仔家傑、家誠同左右手林高演咁，董事袍金就由舊年嘅13萬減到得7萬，少咗46%。唔係吓嘩！
袍金微減 薪津補凸
咪住，睇埋先，四叔講過金叵羅孫女晞彤腳頭好，公司賺大錢，所以袍金減幾皮只係象徵式，皆因薪酬同津貼加番凸有餘。論加幅，梗係二少家誠最威水，薪金連津貼勁升1.06倍，由舊年364萬銀加到749萬銀；酬金總額就升咗1倍，達788.4萬銀（見表）。
咁佢娶咗旺夫子淇、生埋觀音托世晞彤……Sorry，呢啲係私人嘢，恒地係上市公司，公私唔好混埋嚟講。嗱，家誠主力喺香港賣樓，舊年恒地賣樓成績理想，香港物業銷售收入增長1.3倍近79億銀，抵加嘞啩！
至於與佛有緣嘅大佬家傑，就成為恒地唯一千萬年薪嘅高層，薪金連津貼加咗81%，有成1296萬銀，超越埋老竇李兆基，成為執行董事中No.One。家傑主攻內地市場，成日要四圍去昅實大陸嘅生意，唔講其他，淨係舟車勞頓都應該幾辛苦。
千萬年薪 只得大少
至於其他執董，以老臣子林高演最高，薪金連津貼微升4%至657萬銀，不過花紅就勁升32%至1949萬銀；全年合共收2649萬銀，趣趣哋升咗23%。
四叔喺恒地人工一哥地位雖然被大仔取代，佢舊年董事薪金都加咗21%至882萬銀；總酬金就升咗20%，至889萬銀。
真正財源
三父子收息超過12億
對於一般打工仔嚟講，老闆加你一倍薪水，你仲唔大嗌「老細我一定鞠躬盡瘁」！不過，對於股神李四叔三父子，嗰千零萬酬金，簡直濕濕碎啦。四叔一向有「收息王」美譽，今年度恒地中期加末期息，夾埋每股派1.1蚊，三父子今年淨收股息都超過12億銀。
持股今年升值37%
仲有，舊年恒地股價水漲船高，四叔三父子合共持有11.28億股，以恒地噚日收市價59.75元計，賬面值674億銀；由年頭至今，恒地股價升咗37.3%，即係話三父子揸住嘅恒地股份，賬面升值咗183億銀。
咁都不特止噃，今年四叔私人持有嘅兆基財經賺到開晒巷，資產組合由初期500億，爆升3倍至接近2000億。四叔之前講過「炒股好過買樓」，私人投資仲好賺過旗艦本業，次次出嚟都笑到見牙唔見眼，八百零萬酬金，對佢嚟講碎銀嚟啫！
mailto:[email protected]
