甄妮前晚喺澳門文化中心舉行「真心愛你」尾場演唱會，唱完一輪經典金曲後，一時感觸喺台上發表情深對話，甄妮話：「因為我之前感冒，令聲帶及喉嚨受感染，遲啲要開刀做手術，開完刀唔知會點，我當然想繼續唱歌啦。不過我遲啲都要到各地做巡迴演唱。」甄妮又講起有次喺紐約開騷，同樣因喉嚨受感染而開唔到聲，要夾口形唱，係佢嘅一大遺憾。