傅穎（Theresa）前晚穿上熱褲處女行天橋，她緊張得幾乎在樓梯上跌倒，相反行騷經驗豐富及穿得更性感的陳敏之與露半股的莊思敏，表現明顯較淡定，難怪收取五位數字酬勞的Theresa事後不得不慨嘆模特兒錢不易賺。
傅穎、陳敏之、莊思敏、「翻版關之琳」Jocelyn及LisaS.等，前晚在中環為品牌PennyBlack示範秋冬系列服飾，一眾模特兒的衣着都相當性感。Theresa以超短熱褲示人，原本已十分煞食，可惜莊思敏的熱褲更短，露出半個臀部，即時將Theresa比下去。而陳敏之穿上比堅尼上衣配襯黑色外套，也相當搶眼。
實現童年夢想
Theresa自言首次正式行天橋，故此非常緊張，謝幕落樓梯時更幾乎跌倒，幸好只是有驚無險，她說：「着呢套衫要鼓起好大勇氣，我驚有啲凸腩，又唔慣着咁超短熱褲，好似着住件打底褲咁，仲有對咁高嘅高踭鞋。」那麼Theresa會否覺得與職業模特兒一同行騷較遜色？她說：「我同自己講只係客串啫，唔畀自己太大壓力，我細個都諗過做model，但唔夠高行天橋，今次算夢想成真。」
Theresa透露今次收取了五位數字酬勞，她感到非常滿意，但不敢接更性感的服裝騷，因為怕傷害觀眾眼睛，她說：「我呢啲收埋得啦，冇必要攞出嚟獻醜，以前以為model錢易賺，行吓就得，原來都唔易搵，要keep住身材。」Theresa近日被傳與鄧麗欣不和，她也沒有出席對方的生日會，不過Theresa說：「我唔舒服，聲帶發炎咗一個禮拜，唔去好正確。」
最怕着TBack
陳敏之曾試過行泳衣騷走光，她謂今次服飾也有凉浸浸的感覺，問到酬勞可有增加，陳敏之說：「加少少啦，好滿意。」那麼她會否接內衣騷？陳敏之說：「太sexy接受唔到，尺度不過份就OK，意識要正常，其實我唔鍾意着喱士bra同內褲，我好保守，屋企全部係小熊維尼。」那麼男友會否嫌太幼稚？陳敏之說：「冇，鍾意我就要鍾意埋小熊維尼，我個人最憎着Tback。」露半股的莊思敏也不習慣穿上超短熱褲，幸好有外套稍作遮掩。
採訪：卓寶花
攝影：陳志嵐
