港龍開辦直飛航線,由香港直飛日本福岡與仙台,招待傳媒人士,介紹詳情。左丁山在會場內碰到唔少老友記,肥仔郭是其中之一。肥仔郭一開口就話:「唔見你寫《色,戒》嘅?人人都寫晒咯喎?」慚愧,左丁山至今未有時間去戲院睇《色,戒》,好可能等到有正版DVD出咗,先至會買一套在屋企欣賞。但《色,戒》影評就睇得多嘞,例如《蘋果》副刊名采版都有成一萬字喇啩!各報大小專欄,作家教授影評人,從歷史、色情、性愛、電影、導演、演員、張愛玲、漢奸、政治等等角度分析《色,戒》,有一啲內容相信連導演李安都睇唔明。最好笑嘅係有人互相批評,阿A話阿B唔識《色,戒》奧妙,阿B話阿A唔明白李安本意。李安呢套戲為本港寫字人提供大量話題,真係功德無量。不過咁,《色,戒》據講用成兩三億港紙拍成,淨係靠香港市場,必定血本無歸,相信投資者最關心嘅係幾時可以在大陸放映,票房紀錄如何,否則只係在香港叫好叫座,於事無補。
扯得太遠嘞,港龍總裁鄧國杰與日本總領事佐藤重和都話到九州首府福岡,最緊要食九州拉麵,別有風味咁講,另外到仙台食土製牛脷,亦非常出名。睇吓航班時間,飛福岡要三小時,每日早上八點五十分起飛,一點鐘到(日本比香港快一小時),趕得切食九州拉麵做午飯,如果有長周末,星期六早上去,星期一回港(航機下午五點十分),都幾爽,如果星期五可以告埋假,就更加玩得高興。去仙台有乜好玩呢?未去過,唔敢講,鄧總裁就話仙台有「杜之都」迷人自然環境,又有溫泉,歷史名勝,好值得去行吓。
好多年前左丁山到過福岡,當地客戶招呼吃福岡春天名產──河上活魚。好細條魚,一條條在碗中清水游動,日本客戶用筷子夾着一條條放入口生吃,左丁山不忍如此吃之,經客戶三催四請,合埋眼,成碗水飲下,將魚吞落肚,不知其味焉!自福岡租車揸落南部鹿兒島,來回不過數小時,鄧總裁話在日本揸車,有極完善GPS指導,輕鬆容易之至,不妨一試福岡揸車自由行喎。