大陸十七大會議噚日開幕，唔少內地散戶網友起初都諗住，中央應該會陸續推出各種政策，壓抑經濟增長過快、同過熱嘅股市。點知，內地股市升勢銳不可擋，再度出現「紅色星期一」，上海綜合指數再升126點或2.2%，突破6000點關口，收報6030點。
超過美國靠炒股
遊客1號就好老定話：「上個禮拜六，只係提高存款準備金率，相比之前預期央行加息，輕手好多，兼且要到10月25日先實行，所以嚟緊十七大大家都唔使太擔心，會開紅盤。」
好似佢咁樂觀嘅仲有遊人2號，「中國要超過美國，就要全民大煉鋼鐵，即全民大炒股市！」風雪無痕仲諗定炒乜股，「家陣買啲國家扶持嘅行業就絕對冇死錯人，好似搞環保同做農業嘅公司，當然重點係要抓住龍頭股。」
不過，股中作樂就有啲保留：「一句講晒，『急流勇退是良訓』。」
遊客3號亦搭口話：「𠵱家股民好似『溫水煮青蛙』，股市不斷俾人係咁加柴燒旺個火，股民當意識到危機嘅時候，可憐嘅青蛙已經趕唔切喺熱水度跳出嚟。」