今次長實喺賣地場上嘅𤓓事，可以話係吳佳慶攞嚟；不過，以往賣地場上亦曾經發生過唔少插曲，當中好多都與長實直接或者間接有關。最經典嘅要數黃月鶯事件，話說97年金融風暴之前一次賣地，超人李嘉誠前左右手之一周年茂嘅興港，本來好想投到九龍灣一塊商業地皮，點知中途殺出黃月鶯，用八億九千萬高價搶咗塊地。後嚟先知黃女士精神有問題，周年茂當然冇癮；不過，「塞翁失馬，焉知非福」，金融風暴都唔知幾多地產商沒頂。
至於直接衝住長實而嚟嘅插曲，要數99年10月拍賣天水圍地皮，一位自稱媽媽係海逸豪園苦業主嘅姓梁男子，喺拍賣會上大呼小叫，矛頭直指小超李澤鉅。
其實為免影響賣地進行，地政總署有一系列嘅賣地規則，不過同隔籬位傾偈，就唔喺規則管制之內。根據之前地政總署畀地產建設商會嘅賣地場規則，地政總署只係要求發展商喺賣地時上唔可以干擾拍賣，令對手放棄競投，使地皮以低於真正價值成交。