曾特首施政報告內容幾踏實，派糖皆大歡喜。特首報告以往好少講理念，但曾特首開宗明義就講「進步發展觀」（progressivedevelopment），埋尾又問（第一百二十五段）香港人是甚麼人，於是引起傳媒討論「新香港」！新香港人，涉及些少哲學味道喎，特區政府不如邀請洪清田講吓「香港學」，撥款畀佢研究「香港學」，睇吓新香港是如何的新香港。
「進步」（progressive）呢兩個字，左丁山睇見就驚驚哋。魯迅年代，中共大力宣傳，凡站在國民黨一邊的就代表保守落後反動，凡站在中共一邊嘅，就係進步力量。上世紀五十年代，三反五反百花齊放時期，「進步力量」把「右派」打倒，打到永不翻身，直至現在還不能平反，聞者流淚。到咗十年文革，紅衞兵在老毛操控下，又係代表進步力量，喺外國，「進步」與左派思想糾纏不清，累死好多國家，不知何進步之有。
話雖如此，特首之所謂進步發展觀，其實不是甚麼進步與不進步，而是今時今日香港之老生常談。所謂進步發展觀有三方面：（一）基建帶動經濟發展，此是老掉大牙嘅凱因斯模式，思想十分古老；（二）文化帶動社區發展，環境保護，文物保育，呢三樣外國老早做咗；（三）以助人自助理念推動社會和諧，讀《禮記大同篇》，老吾老以及人之老，幼吾幼以及人之幼，是否大同小異呢。
睇真啲，「進步發展觀」只係誤用名詞，反成為特首嘅「標籤包袱」，左丁山就戥佢唔抵。不過特首有時對歷史之詮釋，十分驚人，例如佢在英文電台講到文化大革命係民主之極端，言下之意，文革係中國過份民主所致，就認真嚇人。文革乃係赤裸裸之權力鬥爭，老毛發動文革，利用學生鬥垮鬥臭劉少奇、鄧小平、彭真等人，全部使用暴力，唔係運用手頭上一張選票，根本與民主沾不上邊。老實講當年如果中國有民主選舉制度，老毛點可以獨裁專橫為所欲為，害死數以千萬計嘅中國同胞呀，前有葉劉淑儀講民主與希特拉，今有曾特首講民主與文革，水平如此，香港民主係咁先。