噚日，華華去咗偉仕控股（856）個傳媒飯局，主席李佳林帶咗份無價寶畀華華同一班行家。嗱，華華當然唔係收受利益，呢份禮物其實係李總親筆簽名，兼親自執筆嘅隨想錄──《領悟人生》。
愛情妙不可言
兩年前，李總用咗兩個月寫成呢本大作，裏面以短文、警句、詩歌3種形式記載佢對人生、生命、情感嘅睇法。雖然李總話自己冇宗教信仰，但書裏面幾乎隔幾頁就提到「造物主」，睇嚟佢都相信有「神」嘅存在。不過，李總嘅哲理玄到不得了，「做人很難完美：太善良，不合適投機；太卑鄙，又無法神聖。」
另外，仲大方分享佢嘅愛情觀：「愛情的感覺妙不可言，愛情的誘惑無法抗拒」。
雖然李總係清華電子工程系出身，名副其實理科人一名，但佢嘅文筆都幾細膩流暢。原來佢一得閒就將自己所思所感寫低，話唔定好快會有第二本隨想錄結集成書。