股市大上大落，捉路越嚟越難，不過今日有兩單新聞足以左右大市，分別係大陸「十七大」開幕同賣地。十七大對股市有乜影響，暫時都仲係要估；但賣地後港股例跌，就令唔少網友心慌慌咁過咗個周末假期。
今日舉行拍賣嘅香港仔地皮，規模較大，又係港島區罕見嘅臨海地皮，市場預期成交呎價會好似呢排個股市咁──創同區新高。咁呢個消息會唔會改變賣地後港股例跌嘅宿命呢？網民趁周末冇股炒，就預測吓「星期一賣地，估恒指升定跌？」
好多人都好似常平H兄咁諗，「次次都跌㗎啦。」fifaricky都係咁睇，所以話：「借好消息出貨，慣常地產股做法。」
小地產商投到就係
hhhwong就另有見地，「大地產商投得就升，小地產商投到就跌。」jackyc1st話個市咁旺，唔使驚，「一定唔會跌，人人有錢買法拉利，車隻狗去街街，用石斑嚟餵貓，用X.O嚟漱口。家陣開始，人人魚翅撈飯㖭呀！」