大陸五星級酒店開完一間又一間，唔單止鬥裝修、鬥氣派、鬥服務、鬥配套，仲鬥埋噱頭。天譽置業（059）喺廣州嘅天譽威斯汀酒店上個禮拜五正式開幕，集團上下都唔敢怠慢，事關港穗傳媒兼外地貴賓雲集，公關大員點都要搞啲gimmick。
當晚安排咗一位model喺眾目睽睽之下浸泡泡浴，雖然冇《色，戒》湯唯咁袒蕩蕩，但舉手投足都火辣辣，華華淨係見到幾十部相機嘅閃燈閃嚟閃去。
除咗泡泡浴姐姐，有關方面仲安排咗3位人體彩繪姐姐喺會場，排個靚靚pose畀嘉賓影相，雖然基本上只得一少塊布仔同彩繪遮住重要部位，但model非常專業，一啲都唔扭擰。
有色有食火辣辣
有云「食色性也」，有「色」，自然有「食」，開幕前嘅酒會除咗有酒飲，仲有兩檔小食，一檔即時片北京填鴨、另一檔即時手拉拉麵，人龍排到出GrandBallRoom門外，就知老外幾咁欣賞中國食品。
酒會後，嘉賓仲可以上頂層40樓試試正宗意大利菜兼睇火把舞。家陣酒店開幕真係拍得住電視台嘅台慶！