噚日唔係三八婦女節，但係沙田馬場女人一樣大晒。一年一度嘅婦女銀袋賽馬日噚日有時裝表演，又有贊助商莎莎賣化妝品，女馬迷就算唔落注，都可以shopping。但講到滿載而歸，就冇人比得上賭王四太梁安琪喇，佢仲即席上演咗一幕幾秒鐘之間情緒大起大落大癲大肺嘅女人本色㖭。
話說全日重頭戲婦女銀袋賽，賭王同四太響廂房露台觀戰，賽前賭王一貫淡淡定有錢剩，四太就頻頻展示V字手勢，信心十足。
到咗直路，賭王隻愛駒「爆炸」遲遲先從後趕上，過終點時四太起初以為「爆炸」追唔切，即刻喊咁口，後來身邊嘅人話佢知「爆炸」過咗女馬主張佩珠嘅「永旺財」，四太隨即大聲歡呼，又喪揮雙手，表情變化速度之快，勁過變面大師。四太份人大情大性，贏馬捧盃，八方問佢點慶祝，佢就好豪氣咁話：「食飯囉！魚翅鮑魚囉！」
四太變臉示範
一女士排隊時暈倒
另一女馬主鄺美雲就冇咁好運，頭場佢隻「甜蜜福星」只跑第二，不過賽前佢就益街坊，接受賽馬節目訪問，話明「甜蜜福星」有機，叫拖大熱門「濰坊」，就此一Q搞掂，買10蚊收番123個半，認真有交代。
至於好似八方呢啲平民百姓，當然冇機會拉頭馬。馬會就向每位入場人士送個「閃駿襟針」，雖然馬場朝早10點半至開，但10點左右已有2、300人喺場外排隊。由於人多擠迫，空氣又唔好，大概10點15分，一位年約30歲嘅女士未等到入場，已經焗到暈咗，被在場嘅聖約翰救傷隊抬埋一邊，休息一陣之後自行離開。呢位女士話自己冇食早餐，企企吓突然餓到冇力，所以暈咗。
之前馬會派紀念品搞到秩序大亂有前科。馬會行政總裁應家柏話，今次大約準備咗10萬份「閃駿襟針」，6萬1千幾人入場，全部都攞到贈品，秩序算良好，冇造成任何混亂，嗰位女士暈倒只係個別事件。
但比起上季，今季婦女銀袋日少咗約四千人入場，但佢仍相當滿意，因為今年實施新「改路」措施，為杜絕啲「禮物黨」，啲馬迷入場攞咗紀念品後，要兜好多路先離到場再排隊入場重複攞襟針，唔同以往畀人響閘口出出入入，攞完一次又一次，所以佢認為少咗人入場係正常嘅喎。
