渣打搞馬拉松唔單止係香港一年一度嘅體壇盛事，連員工都受到感染，好似渣打中小企業務理財總監顧韻嬋Betty，返工為生意跑Quota，放工就繼續跑……馬拉松。
98年到家吓，Betty一共參加咗6次渣打馬拉松，其中5次係10公里；另外一次、亦即係最近一次，仲升級跑半馬（超過21公里），成績一次比一次好，準備工夫一次比一次充足，使嘅錢亦一次比一次多。Betty迷上馬拉松除因集團主席戴維思（MervynDavies）鼓勵，仲為咗想挑戰自己。
「最記得98年第一次參賽，乜都唔識，之前又冇跑過長跑，淨係做gym跑過吓。比賽當日，着住件長袖衫、緊身褲同網球鞋，結果用咗個半鐘先完成賽事，第二日對腳嘅肌肉，痛到好似唔係自己咁，不知幾咁挫敗。」不過，小小苦楚等於激勵，佢對自己講下次要做好啲！
「真係跑過先知，室內同室外環境氣溫濕度，樣樣都唔同，而且一個月準備真係唔夠，跟住嗰幾年，我至少用兩三個月時間準備，又問跑得叻嘅同事，應該食啲乜？跑嗰日朝早有乜要做？有乜唔可以做？見到人哋啲衫同鞋又即刻問，喺邊度買？總之乜都問一餐。」
請教練學跑
到決定升級跑半馬，Betty朝朝走去維園練跑都嫌唔夠，索性請個專業跑步教練上堂，「學吓步速同技巧，等我識得幾時快、幾時慢。」咁認真，係因為佢唔單止想跑畢全程，更想跑完之後唔好「死死吓」，咁先至叫做達到目標。
跑咗咁多次，Betty話最記得04年比賽之前要去英國公幹，惟有喺當地返工前跑街練習。嗰次佢喺比賽日前先至坐夜機返香港，跟手第日晨咁早就去跑，估唔到成績反而超出預期。